ભાવનગરમાં રસ્તાઓ બન્યા મુશ્કેલીનું કારણ
ભાવનગર શહેરમાં ચોમાસાની શરૂઆત સાથે જ રસ્તાઓની ખરાબ હાલત ફરી એકવાર ચર્ચાનો વિષય બની છે. શહેરના અનેક વિસ્તારોમાં રસ્તાઓ પર મોટા ખાડા પડતાં વાહનચાલકો અને સ્થાનિકોને ભારે હાલાકીનો સામનો કરવો પડી રહ્યો છે. નવા બનેલા કેટલાક રસ્તાઓમાં પણ ખાડા પડતાં રોડની ગુણવત્તા અંગે સવાલો ઊભા થયા છે.
વાહનચાલકોમાં અકસ્માતનો ભય
સ્થાનિકોના જણાવ્યા અનુસાર અનેક રસ્તાઓ પર એટલા મોટા ખાડા પડી ગયા છે કે બાઇકચાલકો અને રિક્ષાચાલકોને રોજિંદી મુશ્કેલીઓનો સામનો કરવો પડે છે. વરસાદી પાણી ભરાઈ જતાં ખાડાઓ દેખાતા નથી, જેના કારણે અકસ્માતનું જોખમ પણ વધી રહ્યું છે.
નગરસેવકોની રજૂઆત છતાં સ્થિતિ યથાવત્
શહેરના રસ્તાઓની ખરાબ હાલત અંગે અનેક વખત સામાન્ય સભામાં રજૂઆત કરવામાં આવી હોવા છતાં અસરકારક કામગીરી ન થતાં સ્થાનિકોમાં અસંતોષ જોવા મળી રહ્યો છે. નવા રોડમાં પણ ટૂંકા સમયમાં ખાડા પડતાં રોડની ગુણવત્તા અને કામગીરી અંગે પ્રશ્નો ઉઠી રહ્યા છે.
તંત્રનું શું કહેવું છે?
મહાનગરપાલિકાના સ્ટેન્ડિંગ કમિટીના ચેરમેનના જણાવ્યા મુજબ શહેરમાં જ્યાં ખાડા પડ્યા છે ત્યાં તાત્કાલિક પૂરવાની કામગીરી શરૂ કરવામાં આવી છે. વરસાદ બાદ રોડનું સમારકામ પણ કરવામાં આવશે. ઉપરાંત, જે રોડ હજુ ગેરંટી સમયગાળામાં છે અને જ્યાં ગુણવત્તા અંગે પ્રશ્નો છે, ત્યાં સંબંધિત કોન્ટ્રાક્ટરો સામે જરૂરી કાર્યવાહી કરવામાં આવશે.