અરબી સમુદ્રમાં ભારત-પાકિસ્તાનના યુદ્ધજહાજો અથડાયા, બંને દેશે એકબીજાને તલબ કર્યા

અરબી સમુદ્રમાં નૌકાદળના જહાજોની ટક્કર

અરબી સમુદ્રમાં ભારત અને પાકિસ્તાનના નૌકાદળના જહાજો વચ્ચે ટક્કરની ઘટના સામે આવી છે. 15 સપ્ટેમ્બરની સાંજે ઉત્તર અરબી સમુદ્રમાં બનેલી આ ઘટનાને લઈને 16 સપ્ટેમ્બરે ભારતે નવી દિલ્હીમાં પાકિસ્તાનના Charge d’Affairesને તલબ કરીને સખત વિરોધ નોંધાવ્યો હતો. ભારતના જણાવ્યા મુજબ ઘટનામાં કોઈ મોટું નુકસાન થયું નથી.

ભારતનો આરોપ શું છે?

ભારતના જણાવ્યા મુજબ, ભારતીય નૌકાદળનું એક ફ્રન્ટલાઈન યુદ્ધજહાજ નિયમિત દેખરેખ મિશન પર હતું ત્યારે પાકિસ્તાની નૌકાદળનું જહાજ ઊંચી ઝડપે તેની નજીક આવ્યું અને અસુરક્ષિત તથા બિનવ્યાવસાયિક દાવપેચ કર્યા હતા. આ દરમિયાન બંને જહાજો વચ્ચે સંપર્ક થયો. અહેવાલો અનુસાર ભારતીય જહાજને કોઈ મોટું માળખાકીય નુકસાન થયું નથી અને તે પોતાનું મિશન ચાલુ રાખ્યું હતું.

1991ના કરારનો ઉલ્લેખ

ભારતે આ ઘટનાને 1991ના ભારત-પાકિસ્તાન કરારના આર્ટિકલ 10 સાથે જોડીને વાંધો નોંધાવ્યો છે. આ જોગવાઈ મુજબ આંતરરાષ્ટ્રીય જળસીમામાં બંને દેશોના નૌકાદળના જહાજો અને સબમરીન વચ્ચે ઓછામાં ઓછું 3 નોટિકલ માઈલનું અંતર જાળવવાની જોગવાઈ છે, જેથી અકસ્માત ટાળી શકાય. ભારતે કહ્યું છે કે પાકિસ્તાની જહાજનું વર્તન આ જોગવાઈની વિરુદ્ધ હતું.

પાકિસ્તાનનો અલગ દાવો

આ ઘટનાને લઈને પાકિસ્તાને પણ ભારતીય રાજદ્વારી અધિકારીને તલબ કરીને વિરોધ નોંધાવ્યો છે. પાકિસ્તાનના વિદેશ મંત્રાલયનો દાવો છે કે ઘટના તેની Exclusive Economic Zone (EEZ)માં બની અને ભારતીય નૌકાદળના જહાજે પાકિસ્તાની નૌકાદળના જહાજની નજીક આક્રમક દાવપેચ કર્યા હતા. એટલે ઘટનાની સ્થિતિ અને જવાબદારી અંગે બંને દેશોના દાવા અલગ છે.

બંને દેશે રાજદ્વારી વિરોધ નોંધાવ્યો

ભારતે પોતાના ઈસ્લામાબાદ સ્થિત Charge d’Affairesને પણ પાકિસ્તાનના વિદેશ મંત્રાલય સમક્ષ સમાન વિરોધ નોંધાવવા સૂચના આપી છે. બીજી તરફ પાકિસ્તાને પણ નવી દિલ્હીમાં પોતાની કાર્યવાહી કરવાની જાહેરાત કરી છે. હાલ ઉપલબ્ધ સત્તાવાર માહિતી મુજબ ઘટનામાં કોઈ મોટી જાનહાનિનો અહેવાલ નથી, પરંતુ દરિયામાં થયેલી આ ટક્કરે બંને દેશ વચ્ચેના રાજદ્વારી સંબંધોમાં ફરી એક સંવેદનશીલ મુદ્દો ઊભો કર્યો છે.