અસલાલીમાં પોલીસનો દરોડો
અમદાવાદના અસલાલી વિસ્તારમાં વિદેશી દારૂની હેરાફેરીનો મામલો સામે આવ્યો છે. શ્રીજી બંગ્લોઝ પાછળ આવેલા ટી.પી. રોડ પર પોલીસે બાતમીના આધારે દરોડો પાડીને દારૂનું લાઈવ કટિંગ ઝડપી પાડ્યું હતું. પોલીસના જણાવ્યા મુજબ, ક્રેટા કારમાંથી સ્વિફ્ટ ડિઝાયર કારમાં વિદેશી દારૂનો જથ્થો ટ્રાન્સફર કરવામાં આવી રહ્યો હતો.
1,552 બોટલ દારૂ અને બિયર જપ્ત
દરોડા દરમિયાન પોલીસે ભારતીય બનાવટના વિદેશી દારૂ અને બિયરની કુલ 1,552 બોટલો કબજે કરી હતી. આ જથ્થાની કિંમત ₹2,60,512 હોવાનું જણાવાયું છે. દારૂના જથ્થા ઉપરાંત પોલીસે મોબાઇલ ફોન અને અન્ય વાહનો પણ જપ્ત કર્યા હતા.
₹18.29 લાખનો મુદ્દામાલ કબજે
પોલીસે બે કાર સહિત કુલ ₹18,29,512નો મુદ્દામાલ કબજે કર્યો છે. જપ્ત કરાયેલા મુદ્દામાલમાં ક્રેટા કાર, સ્વિફ્ટ ડિઝાયર કાર, ચાર મોબાઇલ ફોન અને અન્ય ચાર વાહનોનો સમાવેશ થાય છે. આ મામલે પોલીસે કાયદેસરની કાર્યવાહી હાથ ધરી છે.
અમદાવાદ અને રાજસ્થાનના ચાર આરોપી ઝડપાયા
દરોડા દરમિયાન પોલીસે ચાર આરોપીઓને ઝડપી પાડ્યા હતા. તેમની ઓળખ અશોકકુમાર બિશ્નોઈ (ઉંમર 25 વર્ષ, રાજસ્થાનના ઝાલોર), નરેન્દ્રસિંહ ઉર્ફે રાજ રાજપૂત (ઉંમર 26 વર્ષ, રામોલ, અમદાવાદ), અનુજ શર્મા (ઉંમર 20 વર્ષ, રામોલ, અમદાવાદ) અને જીજ્ઞેશ ઉર્ફે જીગો વાઘેલા (ઉંમર 30 વર્ષ, ઇસનપુર, અમદાવાદ) તરીકે થઈ છે.
અસલાલી પોલીસે વધુ તપાસ હાથ ધરી
આરોપીઓ સામે ગુનો નોંધી પોલીસે દારૂના જથ્થાના સ્ત્રોત, તેની હેરાફેરી અને તેમાં અન્ય કોઈ વ્યક્તિની સંડોવણી છે કે નહીં તે દિશામાં તપાસ હાથ ધરી છે. જોકે, દારૂ ક્યાંથી લાવવામાં આવ્યો હતો અને તેને ક્યાં પહોંચાડવાનો હતો તે અંગેની વધુ વિગતો ઉપલબ્ધ નથી.