વરસાદ બાદ AMCનું કડક એક્શન
અમદાવાદ શહેરમાં ભારે વરસાદ દરમિયાન બાંધકામની દિવાલો ધરાશાયી થવાની ઘટનાઓ સામે આવ્યા બાદ અમદાવાદ મ્યુનિસિપલ કોર્પોરેશન (AMC) એક્શનમાં આવ્યું છે. શહેરમાં સુરક્ષા ધોરણોનું પાલન થઈ રહ્યું છે કે નહીં તેની તપાસ માટે AMCએ વિવિધ વિસ્તારોમાં બાંધકામ સાઇટોની ચકાસણી હાથ ધરી છે.
166 સાઇટની તપાસ, 11 સામે કાર્યવાહી
AMC દ્વારા કુલ 166 બાંધકામ સાઇટનું નિરીક્ષણ કરવામાં આવ્યું હતું. તપાસ દરમિયાન સુરક્ષા નિયમોનું ઉલ્લંઘન કરતી 11 બાંધકામ સાઇટની મંજૂરી સસ્પેન્ડ કરવામાં આવી છે. ઉપરાંત સંબંધિત એન્જિનિયર અને ડેવલપરને શો-કોઝ નોટિસ ફટકારી સ્પષ્ટતા માંગવામાં આવી છે.
જોધપુર અને સિંધુભવન રોડની ઘટનાઓ બાદ નિર્ણય
તાજેતરમાં જોધપુર અને સિંધુભવન રોડ સહિતના વિસ્તારોમાં બાંધકામની દિવાલો ધરાશાયી થવાની ઘટનાઓ સામે આવી હતી. આ ઘટનાઓને ગંભીરતાથી લઈને AMCએ તમામ બાંધકામ સાઇટની સુરક્ષા વ્યવસ્થાની સમીક્ષા શરૂ કરી છે.
સુરક્ષા નિયમોનું પાલન ફરજિયાત
AMCએ સ્પષ્ટ કર્યું છે કે જ્યાં પણ સુરક્ષા ધોરણોનું પાલન નહીં થાય ત્યાં કડક કાર્યવાહી કરવામાં આવશે. વરસાદી સિઝનમાં કોઈ દુર્ઘટના ન સર્જાય તે માટે તમામ બિલ્ડર અને ડેવલપરને જરૂરી સુરક્ષા વ્યવસ્થા સુનિશ્ચિત કરવા સૂચના આપવામાં આવી છે.