રામોલમાં સગીરા સાથે દુષ્કર્મનો આરોપ
અમદાવાદના રામોલ વિસ્તારમાં 12 વર્ષની સગીરા સાથે દુષ્કર્મનો ગંભીર મામલો સામે આવ્યો છે. આરોપ સગીરાના જ સગા મોટાબાપુ પર છે. આરોપીએ સગીરાને અશ્લીલ વીડિયો બતાવીને દુષ્કર્મ આચર્યું હોવાનો ફરિયાદમાં ઉલ્લેખ છે. બનાવ બાદ સગીરાને ધમકી આપવામાં આવી હોવાનો પણ આક્ષેપ કરવામાં આવ્યો છે.
ઘરમાં એકલી હોવાનો લાભ લીધો હોવાનો આરોપ
ફરિયાદ મુજબ, આરોપી છેલ્લા કેટલાક સમયથી પોતાના નાના ભાઈના ઘરે રહેતો હતો. 15 સપ્ટેમ્બરના રોજ ઘરમાં અન્ય કોઈ સભ્ય હાજર ન હોવાનો લાભ લઈને આરોપીએ સગીરા સાથે દુષ્કર્મ આચર્યું હોવાનો આક્ષેપ છે. ત્યારબાદ સગીરા ભયભીત બની ગઈ હતી અને શરૂઆતમાં સમગ્ર ઘટના અંગે કોઈને જાણ કરી નહોતી.
માતાની સખી સમક્ષ સગીરાએ વાત કરી
આરોપી દ્વારા અવારનવાર અડપલાં કરવામાં આવતા સગીરાએ અંતે પોતાની માતાની સખીને સમગ્ર ઘટના અંગે ખાનગીમાં જાણ કરી હતી. ત્યારબાદ માતાની સખીએ સગીરાની માતાને જાણ કરી હતી. માતાએ પુત્રી પાસેથી હકીકત જાણ્યા બાદ રામોલ પોલીસ મથકમાં ફરિયાદ નોંધાવી હતી.
ફરિયાદ બાદ આરોપી ફરાર થયો
ફરિયાદ નોંધાવવાની જાણ થતાં આરોપી ઘરેથી ફરાર થઈ ગયો હતો અને પોતાનો મોબાઈલ ફોન પણ બંધ કરી દીધો હતો. પોલીસે તપાસ શરૂ કરીને સીસીટીવી ફૂટેજ અને ટેકનિકલ તપાસના આધારે આરોપીની શોધખોળ હાથ ધરી હતી.
અંકલેશ્વરથી આરોપી ઝડપાયો
પોલીસની તપાસ દરમિયાન આરોપી અંકલેશ્વર ખાતે પોતાના એક મિત્રના ઘરે હોવાની માહિતી મળી હતી. ત્યારબાદ પોલીસે ત્યાંથી આરોપીની ધરપકડ કરી હતી. પોલીસે આરોપીને ઝડપવા માટે દહેજ અને ભરૂચ સહિતના વિસ્તારોમાં તપાસ હાથ ધરી હતી.
પોક્સો સહિતની કલમો હેઠળ કાર્યવાહી
આ કેસમાં રામોલ પોલીસે આરોપી વિરુદ્ધ પોક્સો એક્ટ સહિતની લાગુ કલમો હેઠળ ગુનો નોંધ્યો છે. પોલીસ દ્વારા સગીરાના નિવેદન સહિતના જરૂરી પુરાવા એકત્ર કરવામાં આવી રહ્યા છે. આરોપીના મોબાઈલ ફોનની તપાસ તેમજ સીસીટીવી ફૂટેજ અને અન્ય પુરાવા પણ એકત્ર કરવાની કાર્યવાહી ચાલી રહી છે.
FSLમાં પુરાવા મોકલાયા
પોલીસે કેસની તપાસમાં મળેલા જરૂરી વૈજ્ઞાનિક પુરાવા FSLમાં મોકલ્યા છે. સાક્ષીઓના નિવેદનો નોંધવા સહિતની કાયદેસરની કાર્યવાહી આગળ ધપાવવામાં આવી રહી છે. સમગ્ર મામલે પોલીસ તપાસ પૂર્ણ થયા બાદ કેસની હકીકતો વધુ સ્પષ્ટ થશે.