‘વોટ ચોરી’ વિવાદ વચ્ચે 42 પૂર્વ જજોનો પત્ર
ચૂંટણી પંચ, મુખ્ય ચૂંટણી કમિશનર જ્ઞાનેશ કુમાર અને મતદાર યાદીની SIR પ્રક્રિયાને લઈને ચાલી રહેલા રાજકીય વિવાદ વચ્ચે 42 પૂર્વ જજોએ ખુલ્લો પત્ર જાહેર કર્યો છે. પૂર્વ ન્યાયાધીશોએ બંધારણીય સંસ્થાઓ સામે પૂરતા પુરાવા વગરના ગંભીર આક્ષેપો કરવા અંગે ચિંતા વ્યક્ત કરી છે અને કહ્યું છે કે આવા આક્ષેપોથી લોકશાહી સંસ્થાઓમાં લોકોનો વિશ્વાસ નબળો પડી શકે છે.
‘આક્ષેપ કરો, પરંતુ પુરાવા સાથે’
પૂર્વ જજોએ પોતાના પત્રમાં કહ્યું છે કે કોઈપણ બંધારણીય સંસ્થાની કામગીરીની ટીકા કરવી એ લોકશાહીમાં મળેલો અધિકાર છે. પરંતુ સંસ્થાઓ સામે ગંભીર આરોપ લગાવવામાં આવે ત્યારે તથ્યો અને પુરાવા હોવા જરૂરી છે. તેમણે રાજકીય પક્ષોને પોતાની ફરિયાદો માટે કાયદાકીય અને બંધારણીય માર્ગ અપનાવવાની અપીલ કરી છે.
SIR પ્રક્રિયાનું સમર્થન
42 પૂર્વ જજોએ ચૂંટણી પંચ દ્વારા હાથ ધરવામાં આવેલી Special Intensive Revision એટલે કે SIR પ્રક્રિયાનું પણ સમર્થન કર્યું છે. તેમના મતે મતદાર યાદીને વધુ ચોક્કસ અને વિશ્વસનીય બનાવવા માટેની આ પ્રક્રિયા કાયદાકીય માળખા હેઠળ હાથ ધરવામાં આવી રહી છે. સાથે જ તેમણે ચૂંટણી પ્રક્રિયાને સતત શંકાના ઘેરામાં મૂકવાથી લોકશાહી પ્રત્યેના જનવિશ્વાસ પર અસર થવાની ચિંતા વ્યક્ત કરી છે.
વિપક્ષના આક્ષેપો યથાવત
બીજી તરફ વિપક્ષી પક્ષો SIR પ્રક્રિયા અને ચૂંટણી પંચની કામગીરી સામે સતત સવાલો ઉઠાવી રહ્યા છે. વિપક્ષનો દાવો છે કે SIR દરમિયાન મતદારોના નામ પર અસર થઈ શકે છે અને આ મુદ્દે પારદર્શિતા જરૂરી છે. આ મામલે કોર્ટમાં પણ વિવિધ અરજીઓ અને કાનૂની કાર્યવાહી ચાલી રહી છે.
જ્ઞાનેશ કુમાર સામે વિરોધ વચ્ચે પત્ર
મુખ્ય ચૂંટણી કમિશનર જ્ઞાનેશ કુમાર સામે વિપક્ષનું વિરોધ પ્રદર્શન પણ યથાવત છે. ‘વોટ ચોરી’ના આરોપો અને SIRના મુદ્દે કોંગ્રેસ સહિતના વિપક્ષી નેતાઓ દિલ્હીમાં વિરોધ કરી રહ્યા છે. આ રાજકીય ઘમાસાણ વચ્ચે 42 પૂર્વ જજોનો પત્ર સામે આવતા ચૂંટણી પ્રક્રિયા અને બંધારણીય સંસ્થાઓની વિશ્વસનીયતા અંગેની ચર્ચા વધુ તેજ બની છે.