લવ મેરેજનો ભયાનક અંત
સોશિયલ મીડિયા પર શરૂ થયેલી મિત્રતા પ્રેમમાં બદલાઈ અને ત્યારબાદ બંનેએ લગ્ન પણ કર્યા... પરંતુ દોઢ વર્ષમાં જ આ પ્રેમલગ્નનો ભયાનક અંત આવ્યો છે. ઉત્તર પ્રદેશના ઝાંસીમાં એક મહિલાનું શંકાસ્પદ સંજોગોમાં મોત થયું છે. પરિવારજનોએ તેના પતિ યશ ઠાકુર પર ગળું દબાવીને હત્યા કરવાનો આરોપ લગાવ્યો છે. પોલીસ હાલ ફરાર પતિની શોધખોળ કરી રહી છે.
રાત્રે થયો હતો પતિ-પત્ની વચ્ચે ઝઘડો
મૃતકની ઓળખ શિવાની ઉર્ફે સુધા તરીકે થઈ છે. પરિવારજનોના જણાવ્યા અનુસાર રવિવારે રાત્રે શિવાની અને તેના પતિ યશ વચ્ચે ઝઘડો થયો હતો. પરિવારના એક સભ્યએ બંનેને શાંત પાડવાનો પ્રયાસ પણ કર્યો હતો. ત્યારબાદ પરિવારના લોકો અલગ-અલગ રૂમમાં સૂઈ ગયા હતા.
સવારે રૂમમાં મળી લાશ
સવારે શિવાનીનો ભાઈ અનિકેત ઘરે પહોંચ્યો ત્યારે રૂમ બહારથી બંધ હતો. દરવાજો ખોલીને અંદર જોયું તો શિવાની જમીન પર બેભાન હાલતમાં મળી આવી હતી. તેના કાનમાંથી લોહી નીકળતું હતું અને ગળા પર ઈજાના નિશાન જોવા મળ્યા હતા. પરિવારજનો તેને તાત્કાલિક મેડિકલ કોલેજ લઈ ગયા, જ્યાં ડોક્ટરોએ તેને મૃત જાહેર કરી હતી.
પતિ પર હત્યાનો આરોપ
પરિવારજનોએ આરોપ લગાવ્યો છે કે યશે શિવાનીની ગળું દબાવીને હત્યા કરી અને ત્યારબાદ રૂમને બહારથી બંધ કરીને ફરાર થઈ ગયો. પોલીસ અધિકારીઓના જણાવ્યા અનુસાર મહિલાના ગળા પર ઈજાના નિશાન મળ્યા છે અને પોસ્ટમોર્ટમ રિપોર્ટ બાદ મૃત્યુનું ચોક્કસ કારણ વધુ સ્પષ્ટ થશે. પોલીસની ટીમો હાલ યશ ઠાકુરની શોધખોળ કરી રહી છે.
સોશિયલ મીડિયા પર થઈ હતી મિત્રતા
પરિવારના જણાવ્યા અનુસાર શિવાની અને યશની લગભગ બે વર્ષ પહેલાં સોશિયલ મીડિયા મારફતે મિત્રતા થઈ હતી. ત્યારબાદ બંને વચ્ચે પ્રેમ સંબંધ બંધાયો અને પરિવારની સંમતિ બાદ લગભગ દોઢ વર્ષ પહેલાં લગ્ન થયા હતા. લગ્ન બાદ શિવાની ગ્વાલિયરમાં પતિ સાથે રહેતી હતી.
લગ્ન બાદ મારપીટના આક્ષેપ
પરિવારજનોએ એવો પણ આરોપ લગાવ્યો છે કે લગ્ન બાદ નાની-નાની બાબતોને લઈને યશ શિવાની સાથે મારપીટ કરતો હતો. આ કારણસર શિવાની લગભગ ત્રણ મહિના પહેલાં ઝાંસી આવીને પોતાના ભાઈ-બહેન સાથે અલગ રહેવા લાગી હતી. રક્ષાબંધન પહેલાં તે ગ્વાલિયા પણ ગઈ હતી અને ત્યારબાદ પતિ સાથે ઝાંસી પરત આવી હતી.
હાલ પોલીસે આ સમગ્ર ઘટનામાં તમામ પાસાઓને ધ્યાનમાં રાખીને તપાસ શરૂ કરી છે. પોસ્ટમોર્ટમ રિપોર્ટ અને પોલીસ તપાસ બાદ જ હત્યાનું ચોક્કસ કારણ અને ઘટનાક્રમ વધુ સ્પષ્ટ થશે.