ગીરમાં સિંહોના હુમલા રોકવા ટેક્નોલોજીનો સહારો
ગીર વિસ્તારમાં છેલ્લા કેટલાક સમયથી સિંહોના હુમલાના વધતા બનાવોને ધ્યાનમાં રાખીને ગુજરાત વન વિભાગે મહત્વપૂર્ણ પગલાં ભરવાનો નિર્ણય લીધો છે. માનવ-વન્યજીવ સંઘર્ષ ઘટાડવા માટે હવે આર્ટિફિશિયલ ઇન્ટેલિજન્સ (AI), થર્મલ ડ્રોન અને પ્રી-અલર્ટ મોનિટરિંગ સિસ્ટમનો ઉપયોગ કરવામાં આવશે.
શાસણમાં ઉચ્ચ સ્તરીય બેઠક યોજાઈ
આ મુદ્દે શાસણ ખાતે PCCFની અધ્યક્ષતામાં ઉચ્ચ સ્તરીય બેઠક યોજાઈ હતી. બેઠકમાં સરપંચો, માલધારીઓ અને અન્ય સંબંધિત હિતધારકો હાજર રહ્યા હતા. બેઠક દરમિયાન સિંહોના હુમલાઓ અટકાવવા અને લોકોની સુરક્ષા વધારવા અંગે વિવિધ સૂચનો પર ચર્ચા કરવામાં આવી.
હવે AI અને થર્મલ ડ્રોન કરશે મોનિટરિંગ
વન વિભાગ હવે થર્મલ ડ્રોન અને AI આધારિત મોનિટરિંગ સિસ્ટમ દ્વારા સિંહો સહિતના વન્યજીવોની હિલચાલ પર સતત નજર રાખશે. આ ટેક્નોલોજીથી રાત્રિના સમયે પણ વન્યજીવોની ગતિવિધિઓ પર અસરકારક રીતે નજર રાખી શકાશે.
ગામ નજીક સિંહ દેખાય તો પહેલેથી મળશે એલર્ટ
વન વિભાગ પ્રી-અલર્ટ મોનિટરિંગ સિસ્ટમ પણ વિકસાવશે. જો કોઈ ગામ કે વસાહતની નજીક સિંહોની હાજરી નોંધાશે તો સ્થાનિક લોકોને અગાઉથી એલર્ટ કરવામાં આવશે. ઉપરાંત, ટ્રેકર્સ અને ફિલ્ડ સ્ટાફની સંખ્યામાં વધારો કરીને તાત્કાલિક કાર્યવાહી વધુ અસરકારક બનાવવાની પણ યોજના છે.