મલાલાના પુસ્તક પર અમદાવાદમાં ફરી બખેડો
અમદાવાદના વસ્ત્રાપુર વિસ્તારમાં મલાલા યુસુફઝાઈના પુસ્તક ‘I Am Malala’ના વાંચન કાર્યક્રમ દરમિયાન ભારે હોબાળો અને ઘર્ષણ થયું છે. AUDA ગાર્ડનમાં આયોજિત વાંચન સત્ર દરમિયાન વિરોધ કરવા આવેલા લોકો અને કાર્યક્રમમાં હાજર લોકો વચ્ચે બોલાચાલી બાદ મામલો મારામારી સુધી પહોંચ્યો હોવાના અહેવાલ છે. પોલીસના જણાવ્યા મુજબ ઘટનામાં બે લોકોને ઈજા થઈ છે અને ત્રણ લોકોની ધરપકડ કરવામાં આવી છે.
પુસ્તક વાંચન કાર્યક્રમમાં વિરોધ
આ વાંચન સત્ર Student and Youth Collective દ્વારા આયોજિત કરવામાં આવ્યું હતું. કાર્યક્રમમાં મલાલા યુસુફઝાઈ ઉપરાંત એન ફ્રેન્ક સહિતના લેખકોની પુસ્તકોનું વાંચન પણ કરવામાં આવી રહ્યું હતું. આ કાર્યક્રમ અમદાવાદની એક શાળામાં મલાલા અને એન ફ્રેન્કની પુસ્તકોને લઈને ચાલી રહેલા વિવાદની પૃષ્ઠભૂમિમાં યોજાયો હતો.
વિરોધ બાદ મામલો ગરમાયો
અહેવાલો મુજબ વિરોધ કરવા આવેલા કેટલાક લોકો પોતાને બજરંગદળ અને VHP સાથે જોડાયેલા હોવાનું જણાવી રહ્યા હતા. પુસ્તકની પસંદગી સામે વાંધો ઉઠાવવામાં આવ્યો હતો. ત્યારબાદ બંને પક્ષો વચ્ચે બોલાચાલી થઈ અને સ્થિતિ વણસી હતી. કાર્યક્રમના આયોજકોએ કેટલાક લોકો પાસે લાકડીઓ અને અન્ય વસ્તુઓ હોવાનો આક્ષેપ કર્યો છે, જોકે આ બાબતે પોલીસ તપાસ મહત્વની રહેશે.
બે લોકો ઈજાગ્રસ્ત, ત્રણની ધરપકડ
વસ્ત્રાપુર પોલીસના જણાવ્યા મુજબ ઘટનામાં બે લોકોને ઈજા થઈ હતી. પોલીસે સમગ્ર મામલે કાર્યવાહી હાથ ધરી અને ત્રણ લોકોની ધરપકડ કરી છે. ઘટનામાં કોણે કોના પર હુમલો કર્યો અને સમગ્ર ઘર્ષણ કેવી રીતે શરૂ થયું તેની તપાસ ચાલી રહી છે.
શાળાના પુસ્તક વિવાદથી શરૂ થયો મામલો
આ સમગ્ર વિવાદની શરૂઆત અમદાવાદની આનંદ નિકેતન સ્કૂલમાં મલાલા યુસુફઝાઈના ‘I Am Malala’ અને એન ફ્રેન્કની ‘The Diary of a Young Girl’ પુસ્તકને લઈને થયેલા વિરોધથી થઈ હતી. વિરોધ બાદ બંને પુસ્તકોને શાળાની ફરજિયાત વાંચન યાદીમાંથી હટાવીને બાદમાં વૈકલ્પિક કરવામાં આવ્યા હોવાના અહેવાલ છે.
પુસ્તકથી રાજકીય અને વૈચારિક વિવાદ
બજરંગદળ તરફથી મલાલાના કાશ્મીર મુદ્દેના વલણ અને પુસ્તકની પસંદગી સામે વાંધો વ્યક્ત કરવામાં આવ્યો છે. બીજી તરફ પુસ્તક વાંચન કાર્યક્રમના આયોજકોનું કહેવું છે કે વિવિધ વિચારો અને પુસ્તકો વાંચવાનો અધિકાર હોવો જોઈએ. આમ, એક પુસ્તકને લઈને શરૂ થયેલો વિવાદ હવે અભિવ્યક્તિની સ્વતંત્રતા, શિક્ષણ અને વૈચારિક મતભેદ સુધી પહોંચ્યો છે.