રાત્રે 10 વાગ્યે પણ મહિલા સુરક્ષિત હોવી જોઈએ
દિલ્હી-NCRમાં મહિલાઓ અને સગીરાઓ સામેના તાજેતરના જાતીય ગુનાઓને લઈને સુપ્રીમ કોર્ટે દિલ્હી પોલીસ અને તંત્ર પાસેથી જવાબ માગ્યો છે. જસ્ટિસ જે.બી. પારડીવાલા અને જસ્ટિસ કે. વિનોદ ચંદ્રનની બેન્ચે સ્પષ્ટ કર્યું કે દિલ્હીમાં કોઈ મહિલા રાત્રે 10 વાગ્યે રસ્તા પર ચાલતી હોય, મેટ્રોમાં મુસાફરી કરતી હોય કે જાહેર પરિવહનનો ઉપયોગ કરતી હોય ત્યારે તેને સુરક્ષિત હોવાનો અનુભવ થવો જોઈએ.
જાહેર સ્થળો ડેન્જર ઝોન ન બને
સુપ્રીમ કોર્ટે કહ્યું કે પાર્ક, રસ્તા, બસ, મેટ્રો સ્ટેશન, સબ-વે અને ફૂટઓવર બ્રિજ અપૂરતી લાઇટિંગ, નબળી દેખરેખ અથવા પેટ્રોલિંગના અભાવે જોખમી વિસ્તાર બની શકે નહીં. કોર્ટનું ધ્યાન દિલ્હી ખાતે આસ્થા કુંજ પાર્કની ઘટના સહિત તાજેતરના કેટલાક કેસો તરફ દોરાયું હતું.
ફરિયાદો છતાં સુરક્ષા વ્યવસ્થામાં ખામી
આસ્થા કુંજ પાર્કની આસપાસ લેડી શ્રી રામ કોલેજની વિદ્યાર્થિનીઓ દ્વારા અગાઉ જાતીય સતામણી અંગે ફરિયાદો કરવામાં આવી હતી. સુપ્રીમ કોર્ટે નોંધ્યું કે આવી ફરિયાદો બાદ પણ સુરક્ષા વ્યવસ્થામાં જરૂરી સુધારા અને પેટ્રોલિંગમાં અસરકારક વધારો થયો ન હતો.
CCTV લગાવવાથી જ સુરક્ષા નહીં મળે
કોર્ટે સુરક્ષા વ્યવસ્થાઓ માત્ર કાગળ પર કે ઇન્ફ્રાસ્ટ્રક્ચર પૂરતી મર્યાદિત ન રહે તે અંગે ભાર મૂક્યો છે. CCTV કેમેરા કાર્યરત છે કે નહીં, કમાન્ડ અને કંટ્રોલ સિસ્ટમ કેવી રીતે કામ કરે છે, સ્માર્ટ લાઇટિંગની સ્થિતિ શું છે અને ઇમરજન્સી રિસ્પોન્સ કેટલો અસરકારક છે, તેની વિગતો તંત્ર પાસેથી માગવામાં આવી છે.
112થી 181 સુધીનો હિસાબ આપવો પડશે
સુપ્રીમ કોર્ટે ERSS 112, મહિલા હેલ્પલાઇન 181, Safe City Project, Women Help Desks અને One Stop Centres સહિતની વ્યવસ્થાઓની વાસ્તવિક સ્થિતિ અંગે અહેવાલ માગ્યો છે. સાથે જ National Database on Sexual Offenders અને Investigation Tracking System for Sexual Offences જેવી વ્યવસ્થાઓનો દિલ્હી પોલીસ દ્વારા કેટલો ઉપયોગ થાય છે તેની પણ માહિતી માગવામાં આવી છે.
હવે માત્ર યોજના નહીં, જમીન પરનો અમલ મહત્વનો
સુપ્રીમ કોર્ટે સુરક્ષા યોજનાઓ અને માળખાં માત્ર કાગળ પર હોવાને બદલે વાસ્તવમાં કાર્યરત, સુલભ અને ઝડપી પ્રતિસાદ આપનારા છે કે નહીં તે તપાસવા પર ભાર મૂક્યો છે. દિલ્હી-NCRમાં મહિલાઓ અને બાળકો માટે જાહેર સ્થળોને વધુ સુરક્ષિત બનાવવા માટે તંત્રને વ્યવસ્થિત રિપોર્ટ અને પગલાં રજૂ કરવા પડશે.