ઓપરેશન સિંદૂરના કમાન્ડર હવે રામ મંદિરની જવાબદારીમાં
અયોધ્યાના રામ મંદિરના સંચાલનને વધુ વ્યાવસાયિક અને સુવ્યવસ્થિત બનાવવા માટે મહત્વપૂર્ણ નિર્ણય લેવાયો છે. શ્રી રામ જન્મભૂમિ તીર્થ ક્ષેત્ર ટ્રસ્ટે નિવૃત્ત એર માર્શલ જિતેન્દ્ર મિશ્રાની પ્રથમ પૂર્ણકાલિક CEO તરીકે નિમણૂક કરી છે. ઓપરેશન સિંદૂર દરમિયાન ભારતીય વાયુસેનાની પશ્ચિમી વાયુ કમાનનું નેતૃત્વ કરનારા મિશ્રા હવે મંદિર ટ્રસ્ટની વહીવટી અને કામગીરી સંબંધિત જવાબદારીઓ સંભાળશે.
5,585 અરજીઓમાંથી પસંદગી
CEO પદ માટે ટ્રસ્ટને કુલ 5,585 અરજીઓ મળી હતી. પસંદગી પ્રક્રિયા માટે રચાયેલી સર્ચ કમિટીએ ઉમેદવારોની વિગતવાર તપાસ અને મૂલ્યાંકન બાદ અંતિમ ત્રણ નામોની ભલામણ કરી હતી. આ ત્રણમાંથી જિતેન્દ્ર મિશ્રાના નામ પર અંતિમ મહોર લગાવવામાં આવી. ટ્રસ્ટે પસંદગી પ્રક્રિયાને પારદર્શક અને ટેક્નોલોજી આધારિત ગણાવી છે.
ચાર દાયકાની શાનદાર સૈન્ય કારકિર્દી
જિતેન્દ્ર મિશ્રા ડિસેમ્બર 1986માં ફાઇટર પાઇલટ તરીકે ભારતીય વાયુસેનામાં જોડાયા હતા. લગભગ ચાર દાયકાની કારકિર્દીમાં તેમણે અનેક મહત્વપૂર્ણ કમાન્ડ અને ઓપરેશનલ જવાબદારીઓ સંભાળી. તેમના નામે 3,000થી વધુ કલાકની ઉડાનનો અનુભવ છે અને તેઓ ફાઇટર કોમ્બેટ લીડર તેમજ એક્સપેરિમેન્ટલ ટેસ્ટ પાઇલટ તરીકે પણ સેવા આપી ચૂક્યા છે.
ઓપરેશન સિંદૂરથી રામ મંદિર સુધી
ઓપરેશન સિંદૂર દરમિયાન પશ્ચિમી વાયુ કમાનના વડા તરીકે જિતેન્દ્ર મિશ્રાએ મહત્વપૂર્ણ જવાબદારી સંભાળી હતી. એપ્રિલ 2026માં વાયુસેનામાંથી નિવૃત્ત થયા બાદ હવે તેમને રામ મંદિર ટ્રસ્ટમાં નવી જવાબદારી સોંપવામાં આવી છે. તેમની પસંદગી પાછળ મોટા પાયે કામગીરીનું સંચાલન, શિસ્ત, આયોજન અને વહીવટી અનુભવ જેવા પાસાઓને મહત્વ આપવામાં આવ્યું હોવાનું અહેવાલોમાં જણાવાયું છે.