ભાગવતના નિવેદન પર પિત્રોડાનો પ્રહાર
RSS પ્રમુખ મોહન ભાગવતના ‘માનવતાની એકતા’ના નિવેદનને લઈને ઇન્ડિયન ઓવરસીઝ કોંગ્રેસના ચેરમેન સામ પિત્રોડાએ પ્રતિક્રિયા આપી છે. પિત્રોડાએ કહ્યું કે માત્ર નિવેદનો પૂરતા નથી, પરંતુ કોઈ વિચારની સાચી કસોટી તેના અમલથી થાય છે. તેમણે ભાગવતના નિવેદનને લઈને દેશમાં વિવિધ સમુદાયોના લોકોના અનુભવોને પણ ધ્યાનમાં લેવાની વાત કરી.
‘કથની કરતાં કરણી વધુ મહત્ત્વની’
પિત્રોડાએ કહ્યું કે ‘કથની કરતાં કરણી વધુ મહત્ત્વની છે’. તેમના મતે, દરેક વ્યક્તિના સન્માન અને માનવતાની વાત કરવી એક બાબત છે, પરંતુ જમીન પર તેનો અમલ કેવી રીતે થાય છે તે વધુ મહત્વનું છે. તેમણે મુસ્લિમ, ખ્રિસ્તી, યહૂદી અને બૌદ્ધ સમુદાયના લોકોને વર્તમાન પરિસ્થિતિ અંગે પૂછવાની વાત કરી.
રાહુલ ગાંધીના સમર્થનમાં પિત્રોડા
પિત્રોડાએ રાહુલ ગાંધી સામે નોંધાયેલી FIR અને દેશની વિવિધ સંસ્થાઓની ભૂમિકા અંગે પણ સવાલો ઉઠાવ્યા. તેમણે રાહુલ ગાંધીને મજબૂત અને દ્રઢ નેતા ગણાવ્યા અને ન્યાયતંત્ર, ચૂંટણી પંચ, ED તથા પોલીસ જેવી સંસ્થાઓની સ્વતંત્રતા અંગે ચિંતા વ્યક્ત કરી.
7.8% GDP ગ્રોથ પર પણ સવાલ
ભારતના 2026-27ના પ્રથમ ત્રિમાસિક ગાળામાં નોંધાયેલા 7.8% વાસ્તવિક GDP વૃદ્ધિદર અંગે પણ પિત્રોડાએ પ્રશ્નો કર્યા. તેમણે કહ્યું કે માત્ર આર્થિક વૃદ્ધિના આંકડા પૂરતા નથી, પરંતુ તેનો લાભ સામાન્ય લોકો સુધી કેટલો પહોંચ્યો તે પણ જોવું જરૂરી છે. તેમણે પેટ્રોલ, ગેસ, ભોજન અને ભાડા જેવા વધતા ખર્ચનો ઉલ્લેખ કર્યો.
વિકાસ સાથે પર્યાવરણ પર ભાર
પિત્રોડાએ આર્થિક વિકાસ સાથે પર્યાવરણ સંરક્ષણને પણ પ્રાથમિકતા આપવાની વાત કરી. નેપાળના પૂરનો ઉલ્લેખ કરીને તેમણે હિમાલય વિસ્તારમાં રોડ અને ડેમ જેવા પ્રોજેક્ટ્સના પર્યાવરણીય પ્રભાવ અંગે સવાલો ઉઠાવ્યા. આ સમગ્ર નિવેદન બાદ રાજકીય વર્તુળોમાં ચર્ચા તેજ બની છે.