માંજલપુરમાં ભાજપનો ફરી દબદબો
વડોદરાની પ્રતિષ્ઠિત માંજલપુર વિધાનસભા પેટાચૂંટણીમાં ભારતીય જનતા પાર્ટીના ઉમેદવાર સતીશ પટેલે 30,499 મતની જંગી લીડ સાથે વિજય મેળવ્યો છે. કોંગ્રેસના ઉમેદવાર ભીખા રબારીને હરાવી ભાજપે આ બેઠક પર પોતાનો દબદબો યથાવત રાખ્યો છે. જીત બાદ ભાજપના કાર્યકરોમાં ઉજવણીનો માહોલ જોવા મળ્યો.
અધૂરા વિકાસ કાર્યો પૂર્ણ કરવાનો સંકલ્પ
વિજય બાદ સતીશ પટેલે આ જીતને માંજલપુરની જનતા અને ભાજપના કાર્યકરોને સમર્પિત કરી હતી. તેમણે જણાવ્યું કે સ્વર્ગસ્થ ધારાસભ્ય યોગેશ પટેલના અધૂરા વિકાસ કાર્યોને પ્રથમ પ્રાથમિકતા આપવામાં આવશે. સાથે જ સ્થાનિકોની સમસ્યાઓના ઝડપી નિરાકરણ માટે માંજલપુરમાં ધારાસભ્ય કાર્યાલય શરૂ કરવાની પણ જાહેરાત કરી.
કોંગ્રેસના ચૂંટણી પ્રક્રિયા પર ગંભીર આક્ષેપ
પરાજય બાદ કોંગ્રેસના ઉમેદવાર ભીખા રબારીએ ચૂંટણી પ્રક્રિયા પર ગંભીર સવાલો ઉઠાવ્યા છે. તેમણે આરોપ લગાવ્યો કે ચૂંટણી દરમિયાન સરકારી મશીનરીનો દુરુપયોગ થયો હતો અને આચારસંહિતાનો ભંગ કરવામાં આવ્યો હતો. મતદાનના દિવસે ભાજપના કાર્યકરો દ્વારા દબાણ અને હુમલાના પણ તેમણે આક્ષેપ કર્યા. જોકે ભાજપે આ તમામ આક્ષેપોને નકારી કાઢ્યા છે અને ચૂંટણી પંચના નિયમો અનુસાર જ સમગ્ર પ્રક્રિયા પૂર્ણ થઈ હોવાનું જણાવ્યું છે.
પ્રચારથી પરિણામ સુધી ચર્ચામાં રહી ચૂંટણી
માંજલપુર પેટાચૂંટણી દરમિયાન ઉમેદવારી જાહેર થતાં જ સ્થાનિક સ્તરે રાજકીય ચર્ચાઓ શરૂ થઈ હતી. મતદાન દરમિયાન પણ બંને પક્ષના કાર્યકરો વચ્ચે તણાવના દ્રશ્યો જોવા મળ્યા હતા. હવે પરિણામ બાદ ભાજપે જીતનો દાવો મજબૂત કર્યો છે, જ્યારે કોંગ્રેસ ચૂંટણી પ્રક્રિયાની પારદર્શિતા અંગે પ્રશ્નો ઉઠાવી રહી છે.