માલદીવે ચૂકવી $150 મિલિયનની સંપૂર્ણ રકમ
માલદીવે ભારત પાસેથી સ્ટેટ બેંક ઑફ ઇન્ડિયા મારફતે 2019માં મેળવેલી $150 મિલિયનની ટ્રેઝરી બિલ સુવિધા સંપૂર્ણપણે ચૂકવી દીધી છે. 17 સપ્ટેમ્બરે અંતિમ $50 મિલિયનની ચુકવણી કરવામાં આવી હતી. આ સાથે આ નાણાકીય વ્યવસ્થાનો બાકી રહેલો સંપૂર્ણ હિસ્સો સમાપ્ત થયો છે.
6 વખત કરવામાં આવ્યું હતું રોલઓવર
વિદેશ મંત્રાલયના પ્રવક્તા રણધીર જયસ્વાલે જણાવ્યું કે SBIએ 2019માં માલદીવ સરકાર સાથે કુલ $150 મિલિયનના ટ્રેઝરી બિલ સબસ્ક્રાઇબ કર્યા હતા. ત્યારબાદ આ સુવિધાને છ વખત, દરેક વખતે એક વર્ષ માટે લંબાવવામાં આવી હતી. અંતે 17 સપ્ટેમ્બરે $50 મિલિયનની છેલ્લી ચુકવણી થતાં સમગ્ર $150 મિલિયનની રકમ ચૂકવાઈ ગઈ.
₹430 કરોડથી વધુનું વ્યાજ ભારતે ભર્યું
આ સમગ્ર મામલામાં સૌથી મહત્વની બાબત એ છે કે મૂળ રકમ માલદીવ સરકારે ચૂકવી હતી, પરંતુ છેલ્લા પાંચ વર્ષ દરમિયાન આ $150 મિલિયનની ટ્રેઝરી બિલ સુવિધા પરનું વ્યાજ ભારત સરકારે ઉઠાવ્યું હતું. જયસ્વાલના જણાવ્યા મુજબ, ભારત દ્વારા ચૂકવવામાં આવેલા વ્યાજની કુલ રકમ લગભગ $45 મિલિયન, એટલે કે આશરે ₹430 કરોડ હતી.
ભારતની નાણાકીય મદદ ચાલુ રહી
વિદેશ મંત્રાલયે જણાવ્યું કે માલદીવ સાથે ભારતની લાંબા સમયથી વિકાસ ભાગીદારી છે. ભારતે માલદીવની નાણાકીય વ્યવસ્થાને ટેકો આપવા માટે ₹30 બિલિયનની કરન્સી સ્વેપ સુવિધા પણ આપી છે. આ ઉપરાંત SBIએ માલદીવના $350 મિલિયનના ટ્રેઝરી બોન્ડ પણ સબસ્ક્રાઇબ કર્યા છે, જે 2029 અને 2030 સુધી માન્ય છે.
'Neighbourhood First' નીતિનો ઉલ્લેખ
જયસ્વાલે જણાવ્યું કે ટ્રેઝરી બિલને સતત સપોર્ટ આપવો અને સમયાંતરે તેનું રોલઓવર કરવું ભારતની 'Neighbourhood First' અને વિકાસ ભાગીદારીની નીતિ સાથે જોડાયેલું છે. બીજી તરફ માલદીવના નાણા મંત્રાલયે કહ્યું છે કે અંતિમ $50 મિલિયનની ચુકવણી બાદ પણ આવશ્યક ચીજવસ્તુઓ, ઇંધણ અને દવાઓની આયાત માટે પૂરતા વિદેશી હૂંડિયામણની વ્યવસ્થા કરવામાં આવી છે.