ચિત્રકૂટમાં જળપ્રલય
મધ્યપ્રદેશના સતના અને ચિત્રકૂટમાં મુશળધાર વરસાદે તબાહી મચાવી છે. મંદાકિની નદીનું જળસ્તર સામાન્ય કરતાં ઘણું ઉપર પહોંચી ગયું છે. ગોર્ગી ડેમ તૂટતાં અનેક વિસ્તારોમાં પાણી ભરાયા છે, જ્યારે ચિત્રકૂટના રામઘાટ પરનો આશરે 300 મીટર લાંબો પુલ પણ ધોવાઈ ગયો છે.
રામઘાટ પાણીમાં ગરકાવ
પૂરના પાણીથી રામઘાટ અને આસપાસના વિસ્તારોમાં ભારે નુકસાન થયું છે. ઘાટ પર આવેલી અનેક દુકાનો પાણીમાં ડૂબી ગઈ છે. સતી અનસુયા આશ્રમ સહિત અનેક ધાર્મિક સ્થળો તરફ જતા રસ્તાઓ બંધ કરવામાં આવ્યા છે અને યાત્રાળુઓને નીચાણવાળા વિસ્તારોમાં ન જવા સૂચના અપાઈ છે.
છત પરથી લોકોનું રેસ્ક્યુ
પૂરની સ્થિતિને પગલે SDRFની ટીમો બચાવ કામગીરીમાં લાગી છે. કેટલાક વિસ્તારોમાં ફસાયેલા લોકોને હેલિકોપ્ટરની મદદથી સુરક્ષિત સ્થળે ખસેડવામાં આવી રહ્યા છે. ભારે પાણી ભરાવાના કારણે ચિત્રકૂટ નજીક રેલવે વ્યવસ્થા પણ પ્રભાવિત થઈ છે અને કેટલાક ટ્રેનોને સલામતીના કારણોસર રોકવામાં આવી હતી.
26 રાજ્યોમાં વરસાદની આગાહી
હવામાન વિભાગે આગામી દિવસોમાં અનેક રાજ્યોમાં વરસાદની ચેતવણી આપી છે. ગુજરાત સહિત 26 રાજ્યોમાં ભારે વરસાદ અને વાવાઝોડાની શક્યતા વ્યક્ત કરવામાં આવી છે. બંગાળની ખાડીમાં બનેલી હવામાન પ્રણાલી અને ચોમાસાની ટ્રફના પ્રભાવથી દેશના વિવિધ વિસ્તારોમાં વરસાદી માહોલ યથાવત રહેવાની શક્યતા છે.
ગુજરાતમાં પણ નજર
દેશભરમાં ચોમાસાની સક્રિય સ્થિતિ વચ્ચે ગુજરાતમાં પણ વરસાદની આગાહી કરવામાં આવી છે. ભારે વરસાદની શક્યતાને ધ્યાનમાં રાખીને વહીવટી તંત્ર દ્વારા જરૂરી તકેદારી રાખવામાં આવી રહી છે.