જંગલ જમીનના હક માટે મનસુખ વસાવાનો અવાજ, આદિવાસી ખેડૂતો સાથે ઉભા રહેવાનો વિશ્વાસ

જંગલ જમીનના હક માટે સાંસદ મેદાને

નર્મદા જિલ્લાના સાગબારા પંથકમાં વર્ષોથી જંગલ જમીન પર માલિકી અને ખેતીના હક માટે સંઘર્ષ કરી રહેલા આદિવાસી ખેડૂતોના સમર્થનમાં હવે ભરૂચના સાંસદ મનસુખ વસાવા ખુલ્લેઆમ મેદાનમાં આવ્યા છે. લાંબા સમયથી ઉકેલ ન આવતા તેમણે ખોપી ગામની મુલાકાત લઈને ખેડૂતો સાથે બેઠક યોજી હતી.

ખેડૂતો સાથે બેઠક, વન વિભાગને અપીલ

ખોપી ગામે યોજાયેલી બેઠકમાં મનસુખ વસાવાએ જણાવ્યું કે સાગબારા તાલુકાના અનેક ગામોના આદિવાસી ખેડૂતો વર્ષોથી, ખાસ કરીને 2002થી જંગલ જમીન પર ખેતી કરી રહ્યા છે. તેમણે વન વિભાગને અપીલ કરી કે આવા ખેડૂતોને ખેતી કરતા રોકવામાં ન આવે અને સુરત જિલ્લાના ખેડૂતોને જે રીતે રાહત આપવામાં આવી છે, તેવી જ વ્યવસ્થા અહીં પણ કરવામાં આવે.

અહિંસાના માર્ગે લડત ચાલુ રાખવાની સલાહ

સાંસદે ખેડૂતોને સ્પષ્ટ જણાવ્યું કે પોતાના અધિકારો માટેની લડતમાં કોઈપણ પ્રકારનો કાયદો હાથમાં ન લે. તેમણે વન વિભાગના અધિકારીઓ સાથે ઘર્ષણ કે વિવાદ ટાળીને મહાત્મા ગાંધીજીના અહિંસાના માર્ગે શાંતિપૂર્ણ રીતે આંદોલન ચાલુ રાખવાની અપીલ કરી.

ન્યાય ન મળે ત્યાં સુધી સાથે રહેવાનો વિશ્વાસ

મનસુખ વસાવાએ ખેડૂતોને વિશ્વાસ અપાવ્યો કે જંગલ જમીનના હકનો પ્રશ્ન ઉકેલાય અને ખેડૂતોને ન્યાય મળે ત્યાં સુધી તેઓ તેમની સાથે રહેશે. તેમના નિવેદન બાદ આદિવાસી ખેડૂતોમાં નવી આશા જાગી છે.