ગાંધીનગરમાં Blinkit સ્ટોર સામે મોટી કાર્યવાહી
ગાંધીનગરના રાયસણ વિસ્તારમાં આવેલા Blinkit સ્ટોરનું ફૂડ લાયસન્સ તાત્કાલિક અસરથી સસ્પેન્ડ કરવામાં આવ્યું છે. સ્ટોરમાં ફૂડ સેફ્ટી અને સ્વચ્છતાના નિયમોના પાલનમાં ખામીઓ સામે આવ્યા બાદ ગાંધીનગર મહાનગરપાલિકાના ફૂડ વિભાગે કાર્યવાહી કરી છે. TV9 ગુજરાતીના અહેવાલ બાદ તંત્ર હરકતમાં આવ્યું હોવાનું સામે આવ્યું છે.
તપાસમાં અસ્વચ્છતાની પોલ ખૂલી
ફૂડ સેફ્ટી શાખા દ્વારા સ્ટોરની ખાસ તપાસ હાથ ધરવામાં આવી હતી. તપાસ દરમિયાન સ્ટોરની દીવાલો પર કરોળિયાના જાળા, ગંદા અને અસ્વચ્છ રેક પર ખાદ્યચીજોનો સંગ્રહ સહિતની ખામીઓ જોવા મળી હતી. આ ઉપરાંત ખાદ્ય પદાર્થોના અયોગ્ય સંગ્રહ અને સ્વચ્છતાના નિયમોના પાલનમાં પણ ગંભીર ક્ષતિઓ સામે આવી હતી.
ફૂડ સેફ્ટી નિયમોના ભંગ બદલ નોટિસ
તપાસ બાદ ફૂડ સેફ્ટી એક્ટ હેઠળ Blinkit સ્ટોરને ઇમ્પ્રુવમેન્ટ નોટિસ આપવામાં આવી છે. સ્ટોરમાં સેનિટેશન અને હાઇજિનના નિયમોનું યોગ્ય રીતે પાલન થાય તે માટે જરૂરી સુધારા કરવા સૂચના આપવામાં આવી હોવાનું જાણવા મળ્યું છે.
ફૂડ લાયસન્સ તાત્કાલિક સસ્પેન્ડ
ગ્રાહકોના સ્વાસ્થ્ય અને ફૂડ સેફ્ટીને ધ્યાનમાં રાખીને તંત્રએ સ્ટોરનું ફૂડ લાયસન્સ તાત્કાલિક અસરથી સસ્પેન્ડ કરી દીધું છે. એટલે કે નિયમોનું પાલન અને જરૂરી સુધારા ન થાય ત્યાં સુધી સ્ટોર સામેની આ કાર્યવાહી અમલમાં રહેશે.
ઓનલાઇન ફૂડ ડિલિવરીમાં પણ હાઇજિન જરૂરી
આ કાર્યવાહીથી સ્પષ્ટ થાય છે કે ઓનલાઇન ગ્રોસરી અને ફૂડ ડિલિવરીની સુવિધા આપતા સ્ટોર માટે પણ ફૂડ સેફ્ટી અને હાઇજિનના ધોરણોનું પાલન ફરજિયાત છે. ગ્રાહક સુધી પહોંચતા ખાદ્ય પદાર્થોના સંગ્રહ અને હેન્ડલિંગમાં સ્વચ્છતા જાળવવી જરૂરી છે. તંત્રની આ કાર્યવાહી બાદ હવે આવા સ્ટોર્સમાં ફૂડ સેફ્ટીના નિયમોના પાલન પર વધુ નજર રહે તેવી શક્યતા છે.