લઠ્ઠાકાંડ મુદ્દે કોંગ્રેસનો સરકાર પર પ્રહાર
ભાવનગરના ખરકડી લઠ્ઠાકાંડ મામલે હવે રાજકીય ગરમાવો વધુ તેજ બન્યો છે. ઘટનામાં મૃત્યુઆંક વધતો જતાં કોંગ્રેસે રાજ્ય સરકાર અને પોલીસ તંત્રની કામગીરી સામે ગંભીર સવાલો ઉઠાવ્યા છે. કોંગ્રેસે સમગ્ર ઘટનાની હકીકત જાણવા માટે પાંચ સભ્યોની ટીમ ખરકડી મોકલવાનો નિર્ણય કર્યો છે. ઉપલબ્ધ અહેવાલો મુજબ નકલી દારૂના કેસમાં તપાસ તેજ કરવામાં આવી છે અને અનેક લોકોની ધરપકડ પણ થઈ છે.
‘હપ્તા લઈને ગુંડાઓને છૂટ્ટો દોર’નો આક્ષેપ
કોંગ્રેસે ભાજપ સરકાર પર આકરા પ્રહાર કરતા આક્ષેપ કર્યો છે કે ‘હપ્તા લઈને ગુંડાઓને છૂટ્ટો દોર આપવામાં આવે છે.’ કોંગ્રેસે સવાલ ઉઠાવ્યો છે કે જો તંત્રની બેદરકારીના કારણે આવી ગંભીર ઘટના બની હોય તો સરકારમાં ઉચ્ચ પદ પર બેઠેલા જવાબદાર લોકો નૈતિક જવાબદારી સ્વીકારીને રાજીનામું કેમ નથી આપતા?
250 બોટલ અંગે કોંગ્રેસના સવાલો
કોંગ્રેસના આક્ષેપ મુજબ ઝેરી દારૂની અંદાજે 250 બોટલ તૈયાર કરવામાં આવી હતી, જેમાંથી કેટલી બોટલો લોકો સુધી પહોંચી અને તંત્રને તેની જાણ ક્યારે થઈ તે અંગે સવાલો ઉઠાવવામાં આવ્યા છે. એક અહેવાલમાં પણ આશરે 250 બોટલ તૈયાર કરાઈ હોવાનો અને 130 બોટલ જપ્ત કરાઈ હોવાનો ઉલ્લેખ છે.
દૃષ્ટિ ગુમાવ્યાના દાવા, તપાસ પર સવાલ
કોંગ્રેસે દાવો કર્યો છે કે ઝેરી દારૂના સેવન બાદ કેટલાક અસરગ્રસ્ત લોકોની દૃષ્ટિ જતી રહી છે. સાથે જ પ્રથમ મોત બાદ પોસ્ટમોર્ટમ સહિતની પ્રક્રિયા અંગે પણ કોંગ્રેસે સવાલો ઉઠાવ્યા છે. જોકે આ મુદ્દાઓ અંગે અંતિમ સત્તાવાર તબીબી અને તપાસ રિપોર્ટ સામે આવે ત્યાં સુધી આ દાવાઓને આક્ષેપ તરીકે જ જોવાના રહેશે.
પાંચ સભ્યોની ટીમ ખરકડી જશે
સમગ્ર મામલાની જાત તપાસ કરવા માટે કોંગ્રેસની પાંચ સભ્યોની ટીમ ખરકડી જશે. ટીમ ઘટનાસ્થળની મુલાકાત લઈને સ્થાનિક લોકો અને અસરગ્રસ્ત પરિવારો પાસેથી માહિતી મેળવશે અને સમગ્ર ઘટનાની હકીકત જાણવાનો પ્રયાસ કરશે. ત્યારબાદ ટીમ દ્વારા વિગતવાર અહેવાલ તૈયાર કરીને કોંગ્રેસ નેતૃત્વને સોંપવામાં આવશે. દરમ્યાન નકલી દારૂના સપ્લાય અને ઉત્પાદનના નેટવર્કની તપાસ પણ ચાલી રહી છે