ખાડીપૂરથી કંટાળ્યા સુરતવાસીઓ
સુરતના પર્વત પાટિયા વિસ્તારમાં છેલ્લા 25 દિવસમાં ત્રણ વખત ખાડીપૂર સર્જાતા સ્થાનિકોમાં ભારે રોષ જોવા મળી રહ્યો છે. વારંવાર પાણી ભરાવાની સમસ્યાથી પરેશાન લોકો હવે માત્ર આશ્વાસન નહીં પરંતુ કાયમી ઉકેલની માંગ સાથે આંદોલનના માર્ગે આગળ વધ્યા છે.
15થી વધુ સોસાયટીઓએ બનાવી જન આંદોલન સમિતિ
પર્વત પાટિયા સહિત આસપાસની 15થી વધુ સોસાયટીઓના રહીશોએ "જન આંદોલન સમિતિ" બનાવી છે. સ્થાનિકોનું કહેવું છે કે દરેક ભારે વરસાદ બાદ પાણી ભરાઈ જાય છે, જેના કારણે જનજીવન અસ્તવ્યસ્ત બની જાય છે અને લાખો રૂપિયાનું નુકસાન સહન કરવું પડે છે.
ગાંધીનગર સુધી આંદોલનની ચીમકી
રહીશોએ સ્પષ્ટ જણાવ્યું છે કે જો ખાડીપૂરની સમસ્યાનો કાયમી ઉકેલ નહીં આવે તો તેઓ ગાંધીનગર સુધી પદયાત્રા, બાઈક રેલી અને ઉપવાસ આંદોલન કરશે. લોકોનું કહેવું છે કે હવે માત્ર વચનો નહીં પરંતુ જમીન પર પરિણામ જોઈએ.
સાંસદ મુકેશ દલાલે શું કહ્યું?
સુરતના સાંસદ મુકેશ દલાલએ જણાવ્યું કે ખાડીપૂરની સમસ્યાનું મુખ્ય કારણ ખાડીઓ પર થયેલા માનવસર્જિત દબાણો છે. પાણીના કુદરતી પ્રવાહમાં આવેલા અવરોધો દૂર કરીને શહેરની તમામ સાત ખાડીઓનો અભ્યાસ કરવામાં આવશે અને કાયમી ઉકેલ માટે લાંબા ગાળાની કામગીરી હાથ ધરાશે.
સ્થાયી ઉકેલની માંગ તેજ
સાંસદે સ્વીકાર્યું કે લોકોનો રોષ વ્યાજબી છે અને સરકાર સમસ્યાના સ્થાયી ઉકેલ માટે જરૂરી પગલાં ભરી રહી છે. હવે સુરતવાસીઓની નજર તંત્રની કાર્યવાહી પર છે.