હાઈવે પર ગેરકાયદે ઈંધણ વેચાણ સામે કાર્યવાહી
સુરેન્દ્રનગર જિલ્લાના વઢવાણ તાલુકામાં રાજકોટ-અમદાવાદ હાઈવે પર વસ્તડી ગામ નજીક ગેરકાયદે ઈંધણ વેચાણની આશંકાને પગલે તંત્રએ કાર્યવાહી કરી છે. મામલતદાર, પુરવઠા વિભાગ અને પોલીસની સંયુક્ત ટીમે દરોડો પાડીને 1240 લીટર HVO ફ્યુઅલ જપ્ત કર્યું છે અને સંબંધિત પંપને સીલ કરી દીધો છે.
સમુદ્ર એગ્રો એજન્સી ખાતે દરોડો
મળેલી માહિતી અનુસાર, મોમાઈ હોટેલ સામે આવેલી સમુદ્ર એગ્રો એજન્સી દ્વારા સંચાલિત પંપ પર જરૂરી પરવાનગી વિના HVO ફ્યુઅલનું વેચાણ થતું હોવાની બાતમી મળી હતી. તેના આધારે સુરેન્દ્રનગર ડિવિઝનના મદદનીશ પોલીસ અધીક્ષક, વઢવાણ મામલતદાર, પુરવઠા વિભાગના અધિકારીઓ અને પોલીસ સ્ટાફે સ્થળ પર તપાસ હાથ ધરી હતી.
બે ટેન્કમાંથી 1240 લીટર ઈંધણ મળ્યું
દરોડા દરમિયાન એક ટેન્કમાંથી 1040 લીટર અને બીજા ટેન્કમાંથી આશરે 200 લીટર ઈંધણ મળી આવ્યું હતું. આમ, કુલ 1240 લીટર HVO ફ્યુઅલ જપ્ત કરવામાં આવ્યું છે. પ્રતિ લીટર 94 રૂપિયાના હિસાબે આ જથ્થાની કુલ કિંમત 1,16,560 રૂપિયા થાય છે.
નમૂનાઓ લેબોરેટરીમાં મોકલાયા
કાર્યવાહી દરમિયાન અધિકારીઓએ પંચનામું કરીને ઈંધણના નમૂનાઓ એકત્ર કર્યા હતા. આ નમૂનાઓને લેબોરેટરીમાં તપાસ માટે મોકલવામાં આવ્યા છે. તપાસના અહેવાલ અને અન્ય વિગતોના આધારે સંબંધિત પંપ સંચાલકો સામે લાગુ કાયદા અને પુરવઠાના નિયમો મુજબ આગળની કાર્યવાહી કરવામાં આવશે.
તપાસના અહેવાલ બાદ આગળનાં પગલાં
હાલ પંપ સીલ કરી ઈંધણનો જથ્થો જપ્ત કરવામાં આવ્યો છે. ઈંધણની ગુણવત્તા, વેચાણ માટેની પરવાનગી અને અન્ય કાયદાકીય પાસાં અંગેની અંતિમ સ્થિતિ તપાસ બાદ સ્પષ્ટ થશે.