રાહુલ ગાંધીની વિદેશ નીતિ અંગેની ટિપ્પણી બાદ વિવાદ
કોંગ્રેસ નેતા રાહુલ ગાંધી અને સંદીપ દિક્ષીતની ઇટાલીના વડાપ્રધાન જ્યોર્જિયા મેલોની અંગેની ટિપ્પણીને લઈને રાજકીય વિવાદ ગરમાયો છે. સમગ્ર મામલે વિદેશ મંત્રાલયે પ્રતિક્રિયા આપતાં ભારત અને ઇટાલી વચ્ચેના મજબૂત સંબંધોનો ઉલ્લેખ કર્યો છે અને જાહેર ચર્ચામાં સન્માન જાળવવાની અપીલ કરી છે.
રાહુલ ગાંધીની વિદેશ નીતિ પર ટિપ્પણી
કોંગ્રેસના એક કાર્યક્રમમાં રાહુલ ગાંધીએ વડાપ્રધાન નરેન્દ્ર મોદીની વિદેશ નીતિ પર કટાક્ષ કર્યો હતો. તેમણે આરોપ લગાવ્યો કે વડાપ્રધાનના મનમાં વિદેશ નીતિનો અર્થ માત્ર વિદેશી નેતાઓને ગળે મળવા સુધી સીમિત છે. આ દરમિયાન તેમણે મંચ પર સંદીપ દિક્ષીતને બોલાવી ગળે મળીને આ વાતનું ઉદાહરણ આપ્યું હતું.
‘મેલોની સમજીને તો નથી પકડ્યા ને?’
આ દરમિયાન સંદીપ દિક્ષીતે મેલોનીનો ઉલ્લેખ કરતાં કટાક્ષ કર્યો હતો. આ ટિપ્પણી બાદ કાર્યક્રમમાં હાજર લોકો હસ્યા હતા અને વીડિયો સોશિયલ મીડિયા પર વાયરલ થતાં રાજકીય વિવાદ વધુ ઉગ્ર બન્યો હતો.
વિદેશ મંત્રાલયે શું કહ્યું?
વિદેશ મંત્રાલયે સ્પષ્ટ કર્યું કે ભારત અને ઇટાલી વચ્ચેના સંબંધો ખૂબ જ મજબૂત છે અને બંને દેશો આ સંબંધોને વધુ ગાઢ બનાવવા માંગે છે. મંત્રાલયે રાજકીય ટિપ્પણીઓમાં પરસ્પર સન્માન જાળવવાની જરૂરિયાત પર ભાર મૂક્યો છે.
રાજનાથ સિંહે પણ કર્યા આકરા પ્રહાર
રાહુલ ગાંધીની ટિપ્પણીને લઈને સંરક્ષણ મંત્રી રાજનાથ સિંહે પણ આકરી પ્રતિક્રિયા આપી હતી. તેમણે આ પ્રકારની ભાષાને નિંદનીય ગણાવી અને કહ્યું કે લોકશાહી ચર્ચામાં રાજકીય વિરોધ હોવા છતાં ભાષાની મર્યાદા જળવાઈ રહેવી જોઈએ.
ભારત-ઇટાલી સંબંધોનો મુદ્દો કેન્દ્રમાં
આ વિવાદ વચ્ચે વિદેશ મંત્રાલયનું નિવેદન ભારત-ઇટાલી સંબંધોના રાજદ્વારી મહત્વને પણ રેખાંકિત કરે છે. બંને દેશો વચ્ચે રાજકીય, આર્થિક અને વ્યૂહાત્મક ક્ષેત્રોમાં સહયોગ આગળ વધારવાના પ્રયાસો થઈ રહ્યા છે.