2047 સુધી વિકસિત ભારતનું મોટું લક્ષ્ય

નવી દિલ્હી: 80મા સ્વતંત્રતા દિવસના અવસરે વડાપ્રધાન નરેન્દ્ર મોદીએ લાલ કિલ્લાની પ્રાચીર પરથી દેશને સંબોધિત કરતાં 2047 સુધી વિકસિત ભારત બનાવવાનો મોટો સંકલ્પ દેશ સામે મૂક્યો છે. PM મોદીએ કહ્યું કે હવે ભારતે નાના સપનાઓથી આગળ વધીને મોટી મહત્વાકાંક્ષાઓ સાથે પોતાની ક્ષમતાને નવી ઊંચાઈ આપવી પડશે. તેમણે આત્મનિર્ભરતા, ટેક્નોલોજી, ઊર્જા સુરક્ષા, ડિફેન્સ અને યુવાનોને કેન્દ્રમાં રાખીને ભારતના આગામી વિકાસનો રોડમેપ રજૂ કર્યો.

12 વર્ષમાં ભારતની બદલાયેલી તસવીર

PM મોદીએ પોતાના સંબોધનમાં છેલ્લા 12 વર્ષમાં થયેલા પરિવર્તનનો ઉલ્લેખ કર્યો. તેમણે જણાવ્યું કે ડિફેન્સ ઉત્પાદન લગભગ ચાર ગણું, ખાદી અને ગ્રામોદ્યોગનું ઉત્પાદન પાંચ ગણું અને ઈલેક્ટ્રોનિક્સ મેન્યુફેક્ચરિંગ લગભગ સાત ગણું વધ્યું છે. રેલવે કોચનું ઉત્પાદન 21 ગણું અને મોબાઇલ ફોનનું ઉત્પાદન આશરે 33 ગણું વધ્યું હોવાનું પણ તેમણે જણાવ્યું.

ડિજિટલ ઈન્ડિયામાં પણ મોટો ઉછાળો

ડિજિટલ ક્ષેત્રની વાત કરતાં PM મોદીએ જણાવ્યું કે છેલ્લા 12 વર્ષમાં ઈન્ટરનેટ વપરાશકારોની સંખ્યા લગભગ ચાર ગણું, પેટન્ટ ગ્રાન્ટ ચાર ગણું અને ડિજિટલ ટ્રાન્ઝેક્શન આશરે 100 ગણું વધ્યું છે. આ આંકડાઓને તેમણે ભારતના ઝડપી ડિજિટલ પરિવર્તનના ઉદાહરણ તરીકે રજૂ કર્યા.

આત્મનિર્ભર ભારત પર ખાસ ભાર

PM મોદીએ કહ્યું કે કોઈ પણ દેશ સતત બીજા દેશો પર નિર્ભર રહીને પોતાની ક્ષમતાને મજબૂત બનાવી શકતો નથી. ભારતે પોતાના હિતોની સુરક્ષા માટે આત્મનિર્ભર ભારત અને Make in Indiaને વધુ મજબૂત બનાવવું પડશે. સેમિકન્ડક્ટર ક્ષેત્રમાં ભારતે પોતાની ક્ષમતા વિકસાવવાનું શરૂ કર્યું છે અને ત્રણ સેમિકન્ડક્ટર પ્લાન્ટ શરૂ થઈ ચૂક્યા હોવાનું તેમણે જણાવ્યું. આગામી એકથી બે વર્ષમાં વધુ 7થી 8 ઉત્પાદન સુવિધાઓ શરૂ કરવાની દિશામાં પણ કામ ચાલી રહ્યું છે.

ઊર્જા સુરક્ષા માટે 2047નું મોટું લક્ષ્ય

ઊર્જા ક્ષેત્રે PM મોદીએ પરમાણુ ઊર્જાને મહત્વનું સ્થાન આપ્યું. તેમણે 2047 સુધી ભારતની પરમાણુ ઊર્જા ક્ષમતા 100 GW સુધી લઈ જવાનો લક્ષ્યાંક જાહેર કર્યો. આગામી 6થી 7 વર્ષમાં પાંચ નવા રિએક્ટર કાર્યરત કરવાની દિશામાં પણ તેમણે વાત કરી. સાથે જ Fast Breeder Nuclear Technologyમાં ભારતે મહત્વપૂર્ણ પ્રગતિ કરી હોવાનું જણાવ્યું.

ઘર-ઘર ગેસ અને સોલર ઊર્જા

PM મોદીએ ઊર્જાના વિવિધ સ્ત્રોતોના વિસ્તરણનો ઉલ્લેખ કરતાં જણાવ્યું કે આજે દેશના આશરે 1.75 કરોડ ઘરો સુધી પાઇપ દ્વારા રસોઈ ગેસ પહોંચી રહ્યો છે. બીજી તરફ PM Surya Ghar Muft Bijli Yojana હેઠળ 50 લાખથી વધુ ઘરો સોલર ઊર્જા સાથે જોડાઈ ચૂક્યા છે. તેમણે જણાવ્યું કે સોલર સહિતના વૈકલ્પિક ઊર્જા સ્ત્રોતો દ્વારા ભારત પોતાની ઊર્જા જરૂરિયાતો વધુ મજબૂત રીતે પૂરી કરવાની દિશામાં આગળ વધી રહ્યું છે.

ડિફેન્સમાં આત્મનિર્ભરતા અને વૈશ્વિક સપ્લાયર બનવાનું લક્ષ્ય

PM મોદીએ ડિફેન્સ ક્ષેત્રે પણ ભારતના આગામી લક્ષ્યની વાત કરી. તેમણે ભારતને માત્ર પોતાની સુરક્ષા જરૂરિયાતો પૂરી કરતું નહીં, પરંતુ ડિફેન્સ ટેક્નોલોજીનો મોટો વૈશ્વિક સપ્લાયર બનાવવાની દિશામાં આગળ વધવાની વાત કરી. ડ્રોન, કાઉન્ટર-ડ્રોન અને હાઇપરસોનિક ટેક્નોલોજી જેવા ક્ષેત્રોમાં ભારતે પોતાની ક્ષમતા વધારવી પડશે તેમ તેમણે જણાવ્યું.

યુવાનો હશે વિકસિત ભારતના મુખ્ય શિલ્પી

વિકસિત ભારતના લક્ષ્યમાં યુવાનોની ભૂમિકા પર પણ PM મોદીએ ભાર મૂક્યો. સ્ટાર્ટઅપ ઈન્ડિયા, સ્કિલ ઈન્ડિયા, ડિજિટલ ઈન્ડિયા, સ્પેસ સેક્ટર અને Khelo India જેવી પહેલો દ્વારા યુવાનો માટે નવી તકો ઊભી થઈ રહી હોવાનું તેમણે જણાવ્યું. દેશમાં હાલમાં આશરે 2.5 લાખ નોંધાયેલા સ્ટાર્ટઅપ્સ હોવાનો પણ ઉલ્લેખ કરવામાં આવ્યો.

2047 સુધી વિકસિત ભારતનો સંકલ્પ

લાલ કિલ્લા પરથી PM મોદીએ ફરી એકવાર સ્પષ્ટ કર્યું કે ભારતનું મોટું લક્ષ્ય 2047 સુધી વિકસિત રાષ્ટ્ર બનવાનું છે. તેમણે દેશવાસીઓને પોતાની ક્ષમતામાં વિશ્વાસ રાખવા, આત્મનિર્ભર બનવા અને રાષ્ટ્રીય હિતને સર્વોચ્ચ સ્થાન આપવા આહ્વાન કર્યું. PM મોદીના સંબોધનનો મુખ્ય સંદેશ સ્પષ્ટ રહ્યો—ભારતે હવે નાના લક્ષ્યો નહીં, પરંતુ મોટા સપનાઓ અને મોટા સંકલ્પો સાથે આગળ વધવાનું છે.