‘ફિક્સ ધ સ્કૂલ્સ’ અભિયાન વચ્ચે FIR
મહારાષ્ટ્રના લાતુર જિલ્લામાં કોકરોચ જનતા પાર્ટી (CJP)ના સ્થાપક અભિજીત દિપકે સામે FIR નોંધાતા વિવાદ સર્જાયો છે. સરકારી શાળામાં અગાઉથી પરવાનગી કે જાણકારી વિના પ્રવેશ કરવા, સત્તાવાર કામગીરીમાં અડચણ ઊભી કરવા અને શિક્ષકોને ધમકી આપવાના આરોપસર ઔસા પોલીસ સ્ટેશનમાં કેસ નોંધાયો છે. આ FIR એક શિક્ષકની ફરિયાદના આધારે નોંધાઈ હોવાનું સામે આવ્યું છે.
શાળામાં જઈ વિદ્યાર્થીઓને સવાલ કર્યાનો આરોપ
ફરિયાદ મુજબ, લાતુર જિલ્લાના જાવલી ગામની જિલ્લા પરિષદ ઉર્દૂ શાળામાં અભિજીત દિપકે અને તેમના સાથીઓ પરવાનગી વિના પ્રવેશ્યા હોવાનો આરોપ છે. ફરિયાદમાં જણાવ્યા પ્રમાણે તેઓ વિદ્યાર્થીઓ વચ્ચે બેઠા અને તેમને વિવિધ સવાલો પૂછ્યા હતા. જેના કારણે વર્ગખંડમાં ચાલી રહેલી શૈક્ષણિક અને સત્તાવાર કામગીરીમાં ખલેલ પડી હોવાનો આક્ષેપ કરવામાં આવ્યો છે.
વીડિયો બનાવી સોશિયલ મીડિયામાં શેર કર્યો હોવાનો દાવો
ફરિયાદમાં એવો પણ આરોપ છે કે ઘટનાનો વીડિયો રેકોર્ડ કરીને સોશિયલ મીડિયા પર શેર કરવામાં આવ્યો હતો. ફરિયાદી પક્ષનો દાવો છે કે વીડિયોમાં શાળાની કામગીરી અંગે સવાલો ઉઠાવવામાં આવ્યા હતા અને બીજી શાળાના વિદ્યાર્થીઓને વર્ગખંડમાં બેસાડવામાં આવ્યા હોવાનો આરોપ મૂકાયો હતો.
શિક્ષકોને સસ્પેન્ડ કરવાની ધમકી?
અભિજીત દિપકે પર શિક્ષકોને સસ્પેન્ડ કરાવવાની ધમકી આપ્યાનો પણ ફરિયાદમાં આરોપ કરવામાં આવ્યો છે. આ મામલે ભારતીય ન્યાય સંહિતા એટલે કે BNSની કલમ 132, 329(3), 351(2) અને 356(2) હેઠળ FIR નોંધવામાં આવી હોવાનું જણાવાયું છે. પોલીસ દ્વારા સમગ્ર મામલે વધુ તપાસ હાથ ધરવામાં આવી છે.
‘ફિક્સ ધ સ્કૂલ્સ’ અભિયાન શું છે?
અભિજીત દિપકે હાલમાં ‘ફિક્સ ધ સ્કૂલ્સ’ અભિયાન ચલાવી રહ્યા છે. આ અભિયાન હેઠળ તેઓ વિવિધ વિસ્તારોની સરકારી શાળાઓની મુલાકાત લઈને શાળાઓની માળખાકીય સુવિધાઓ અને શિક્ષણ વ્યવસ્થાને લઈને સવાલો ઉઠાવી રહ્યા છે. તેમના જણાવ્યા મુજબ શાળાઓની વાસ્તવિક સ્થિતિ સામે લાવી તેમાં સુધારો કરવો આ અભિયાનનો હેતુ છે.
હિંગોલીમાં કાર્યવાહીનો દાવો
અભિજીત દિપકેના જણાવ્યા મુજબ, હિંગોલી જિલ્લાના સંતુક પિંપરી ગામમાં આવેલી જિલ્લા પરિષદ શાળાની મુલાકાત દરમિયાન તેમણે શાળાના આચાર્ય સામે ગંભીર આક્ષેપો કર્યા હતા અને તેમને સસ્પેન્ડ કરવાની માંગ કરી હતી. ત્યારબાદ આચાર્યને સસ્પેન્ડ કરવામાં આવ્યા અને ચાર નવા શિક્ષકોની નિમણૂક કરવામાં આવી હોવાનો દાવો તેમણે કર્યો છે. વિદ્યાર્થીઓ માટે બેન્ચની વ્યવસ્થા કરવામાં આવી હોવાનો પણ તેમનો દાવો છે.
હવે લાતુર FIR બાદ સવાલો
એક તરફ દિપકે સરકારી શાળાઓની સ્થિતિ સુધારવા માટે અભિયાન ચલાવવાનો દાવો કરી રહ્યા છે, તો બીજી તરફ લાતુરમાં પરવાનગી વિના શાળામાં પ્રવેશ અને શિક્ષકોને ધમકી આપવાના આરોપસર FIR નોંધાઈ છે. હવે પોલીસ તપાસમાં સમગ્ર ઘટનાની હકીકત શું સામે આવે છે અને બંને પક્ષની શું ભૂમિકા હતી, તેના પર નજર રહેશે.
નોંધ: અભિજીત દિપકે સામેના આરોપો ફરિયાદ અને FIRમાં કરવામાં આવેલા આક્ષેપો પર આધારિત છે. આરોપો સાબિત થયા હોવાનું માનવું નહીં. પોલીસ તપાસ અને કોર્ટની કાર્યવાહી બાદ જ અંતિમ હકીકત સ્પષ્ટ થશે.