Gen Z અંગે મોહન ભાગવતની મહત્વપૂર્ણ ટિપ્પણી
રાષ્ટ્રીય સ્વયંસેવક સંઘ (RSS)ના સરસંઘચાલક મોહન ભાગવતે Gen Z (Generation Z) અંગે મહત્વપૂર્ણ નિવેદન આપતાં કહ્યું કે "વિરોધ કરવો એ રાજદ્રોહ નથી." તેમણે જણાવ્યું કે લોકશાહીમાં દરેક નાગરિકને વિરોધ કરવાનો અધિકાર છે, પરંતુ તે ભારતના બંધારણમાં નિર્ધારિત મર્યાદાઓ અને કાયદાના દાયરામાં થવો જોઈએ.
નવી પેઢીની વિચારસરણીને ગણાવી સકારાત્મક
મોહન ભાગવતના જણાવ્યા મુજબ, આજની Gen Z અગાઉની પેઢી કરતાં વધુ તાર્કિક છે. તેઓ દરેક બાબતે પ્રશ્ન પૂછે છે અને તર્કસંગત જવાબ ઈચ્છે છે. તેમના મતે આ બદલાવ સમાજ માટે સકારાત્મક છે. નવી પેઢી માત્ર જવાબ નહીં, પરંતુ વિશ્વાસ, સંવાદ અને સન્માન પણ ઈચ્છે છે.
વિરોધનો અધિકાર છે, પરંતુ મર્યાદા પણ જરૂરી
તેમણે ભારપૂર્વક જણાવ્યું કે લોકશાહીમાં અસહમતિ વ્યક્ત કરવી અને સરકારને પ્રશ્ન પૂછવો દરેક નાગરિકનો અધિકાર છે. જોકે વિરોધનો હેતુ વ્યવસ્થામાં સુધારો લાવવાનો હોવો જોઈએ, કોઈ વ્યક્તિ કે સંસ્થાને નિશાન બનાવવાનો નહીં. તેમણે મહાત્મા ગાંધી અને ડૉ. બાબાસાહેબ આંબેડકરનો ઉલ્લેખ કરીને કહ્યું કે બંનેએ પણ શાંતિપૂર્ણ અને બંધારણીય માર્ગે વિરોધનું મહત્વ સમજાવ્યું હતું.
શિક્ષણ પર પણ વ્યક્ત કર્યા વિચારો
શિક્ષણ અંગે મોહન ભાગવતે કહ્યું કે "શિક્ષણ કોઈ વ્યવસાય નથી." તેમણે દેશની ઘણી શાળાઓમાં મૂળભૂત સુવિધાઓના અભાવ અંગે ચિંતા વ્યક્ત કરી અને ગુણવત્તાયુક્ત શિક્ષણ દરેક બાળક સુધી પહોંચે તે માટે સરકાર અને સમાજ બંનેએ સાથે મળીને કામ કરવાની જરૂરિયાત દર્શાવી. તેમણે શિક્ષણ માટે GDPના 6 ટકા જેટલા બજેટની માંગને પણ યોગ્ય ગણાવી.