ટીમ ઈન્ડિયાના પ્રદર્શન બાદ BCCI એક્શનમાં
ટીમ ઈન્ડિયાના તાજેતરના વિદેશ પ્રવાસના પરિણામો અને ખેલાડીઓની વધતી ઈજાઓ વચ્ચે BCCI આજે મુંબઈમાં મહત્વપૂર્ણ રિવ્યૂ બેઠક યોજી રહ્યું છે. હેડ કોચ ગૌતમ ગંભીર, ચીફ સિલેક્ટર અજિત અગરકર અને સેન્ટર ઓફ એક્સલન્સના વડા VVS લક્ષ્મણ સહિત ક્રિકેટ બોર્ડના ટોચના અધિકારીઓ બેઠકમાં હાજર રહેશે.
1. આયર્લેન્ડ-ઇંગ્લેન્ડ પ્રવાસનું પોસ્ટમોર્ટમ
બેઠકમાં ટીમ ઈન્ડિયાના તાજેતરના પ્રદર્શનની સમીક્ષા સૌથી મહત્વના મુદ્દાઓમાંથી એક રહેશે. આયર્લેન્ડ અને ઇંગ્લેન્ડ પ્રવાસમાં ટીમના નિરાશાજનક પરિણામો બાદ ક્યાં ભૂલ થઈ અને તેમાં સુધારો કેવી રીતે કરવો, તેના પર ચર્ચા થવાની શક્યતા છે.
2. ખેલાડીઓની ફિટનેસ અને ઈજાઓ
ભારતીય ક્રિકેટમાં છેલ્લા કેટલાક સમયથી ખેલાડીઓની ઈજા અને રિહેબિલિટેશન મોટો મુદ્દો બન્યો છે. તેથી BCCIના Centre of Excellence, ફિટનેસ ટેસ્ટ અને ઈજાગ્રસ્ત ખેલાડીઓની વાપસીની સમયમર્યાદા અંગે ગંભીર ચર્ચા થઈ શકે છે. IPLના વર્કલોડની ખેલાડીઓની ફિટનેસ પર થતી અસર પણ ચર્ચાના મુદ્દામાં છે.
3. હાર્દિક પંડ્યા અને ફાસ્ટ બોલરોની ફિટનેસ
હાર્દિક પંડ્યાની ફિટનેસ પર પણ ખાસ નજર રહેશે. 2027 ODI વર્લ્ડ કપને ધ્યાનમાં રાખીને હાર્દિક કેટલો ODI વર્કલોડ સંભાળી શકે છે તે મહત્વનો સવાલ છે. સાથે જ જસપ્રીત બુમરાહ સહિત ભારતના ફાસ્ટ બોલિંગ રિસોર્સનું મેનેજમેન્ટ પણ ચર્ચાશે.
4. ન્યૂઝીલેન્ડ પ્રવાસની તૈયારીઓ
ભારતનો આગામી મહત્વપૂર્ણ ન્યૂઝીલેન્ડ પ્રવાસ પણ બેઠકના એજન્ડામાં છે. ઓક્ટોબર-નવેમ્બરમાં યોજાનારા આ પ્રવાસ પહેલાં ખેલાડીઓની ઉપલબ્ધતા, ફિટનેસ અને ટીમ કોમ્બિનેશન અંગે રોડમેપ તૈયાર કરવા પર ચર્ચા થઈ શકે છે.
5. 2027 ODI વર્લ્ડ કપનો રોડમેપ
બેઠકનો સૌથી લાંબા ગાળાનો મુદ્દો 2027 ODI વર્લ્ડ કપ રહેશે. વર્લ્ડ કપને ધ્યાનમાં રાખીને કયા ખેલાડીઓ પર વિશ્વાસ રાખવો, ફિટનેસ કેવી રીતે મેનેજ કરવી અને ટીમ મેનેજમેન્ટ, સિલેક્ટર્સ તથા Centre of Excellence વચ્ચે વધુ સારો તાલમેલ કેવી રીતે બનાવવો—તે અંગે ચર્ચા થવાની શક્યતા છે