ફ્લાયદુબઈ કોકપિટ કાંડમાં નેતન્યાહૂનો કડક સંદેશ
ફ્લાયદુબઈની દુબઈથી તેલ અવીવ જઈ રહેલી ફ્લાઈટમાં કોકપિટની અંદર થયેલા ગંભીર હુમલા બાદ ઈઝરાયલના વડાપ્રધાન બેન્જામિન નેતન્યાહૂએ કડક સંદેશ આપ્યો છે. ભારતીય કેપ્ટન સ્મિત મચ્છર પર કથિત હુમલા બાદ વિમાનનું ઈમરજન્સી લેન્ડિંગ સાઉદી અરેબિયાના તબુકમાં કરાવાયું હતું. હવે ઘટનાના કારણો અને સંભવિત આતંકી કનેક્શનની તપાસ તેજ કરવામાં આવી છે.
નેતન્યાહૂએ કહ્યું ભારે કિંમત ચૂકવવી પડશે
નેતન્યાહૂએ પોતાના નિવેદનમાં કહ્યું કે ઘટનાની તપાસ આગળ વધતા ચિત્ર વધુ સ્પષ્ટ થઈ રહ્યું છે. તેમના જણાવ્યા અનુસાર, તપાસકર્તાઓ એ પણ તપાસી રહ્યા છે કે હુમલાખોરને કોઈએ મોકલ્યો હતો કે નહીં. તેમણે કહ્યું કે જે કોઈ આ ઘટનાની પાછળ હશે, તેણે ભારે કિંમત ચૂકવવી પડશે.
આતંકી એંગલની તપાસ, પરંતુ અંતિમ તારણ નહીં
ઈઝરાયલી અધિકારીઓએ ઘટનામાં સંભવિત આતંકી અથવા કટ્ટરપંથી પ્રેરણા અંગે તપાસ શરૂ કરી છે. ઈરાન સાથે કોઈ કનેક્શન છે કે નહીં તેની પણ તપાસ થઈ રહી હોવાનું નેતન્યાહૂએ જણાવ્યું છે. જોકે ઘટનાના મૂળ કારણો અને હુમલાખોરના ઈરાદા અંગે સત્તાવાર તપાસ હજુ ચાલુ છે અને અંતિમ તારણ સામે આવ્યું નથી.
કોકપિટમાં હુમલો અને અચાનક વિમાનનું ડાઈવ
30 સપ્ટેમ્બરે ફ્લાયદુબઈની FZ1073 ફ્લાઈટ દુબઈથી તેલ અવીવ જઈ રહી હતી. ઉડાન દરમિયાન કોકપિટમાં બંને પાયલટ વચ્ચે ગંભીર અથડામણ થઈ અને ભારતીય કેપ્ટન સ્મિત મચ્છર ઘાયલ થયા. ઘટનાની વચ્ચે વિમાન ખૂબ જ ઝડપથી નીચે આવ્યું અને ઇમરજન્સી સિગ્નલ આપવામાં આવ્યા. ઘાયલ હોવા છતાં કેપ્ટને કોકપિટનો દરવાજો ખોલવામાં સફળતા મેળવી, જેના બાદ મુસાફરો અને ક્રૂએ હુમલાખોરને કાબૂમાં લેવામાં મદદ કરી.
તબુકમાં ઈમરજન્સી લેન્ડિંગ
કોકપિટમાં સર્જાયેલી સ્થિતિ બાદ વિમાનને સાઉદી અરેબિયાના તબુક એરપોર્ટ તરફ વાળવામાં આવ્યું અને ત્યાં સુરક્ષિત ઈમરજન્સી લેન્ડિંગ કરાયું. ઘટનામાં કેપ્ટન સ્મિત મચ્છરને ઈજા થઈ હતી અને તેમને સારવાર આપવામાં આવી રહી છે. વિમાનમાં સવાર મુસાફરોને બાદમાં સુરક્ષિત રીતે તેમના ગંતવ્ય તરફ મોકલવામાં આવ્યા હતા.
તપાસમાં હવે અનેક એંગલ
આ ઘટનાની તપાસમાં હુમલાનો હેતુ, અગાઉથી કોઈ આયોજન હતું કે નહીં અને કોઈ સંગઠન અથવા અન્ય વ્યક્તિ સાથે કનેક્શન હતું કે નહીં જેવા મુદ્દાઓ તપાસ હેઠળ છે. ફ્લાયદુબઈએ પણ તપાસ પૂર્ણ થાય ત્યાં સુધી ઘટનાના કારણો અંગે વહેલી અટકળોથી બચવાની અપીલ કરી છે.