અમેરિકામાં અજીબ ચોરી
અમેરિકામાં રહેતા એક ભારતીય પરિવાર સાથે ચોંકાવનારી ઘટના સામે આવી છે. પાર્કિંગમાં ઊભેલી કારના ચારેય પૈડાં ચોરો ખોલીને લઈ ગયા. પરંતુ આ ચોરીમાં સૌથી આશ્ચર્યજનક વાત એ રહી કે ચોરો માત્ર પૈડાં લઈને જ નહોતા ગયા, પરંતુ જતાં જતાં ઘટનાસ્થળે એક વિચિત્ર નોટ પણ છોડી ગયા.
કારના ચારેય પૈડાં ગાયબ
મળતી માહિતી પ્રમાણે, ભારતીય મહિલાના ભાઈએ સવારે ઊઠીને જોયું તો પાર્કિંગમાં ઊભેલી તેની કારના ચારેય પૈડાં ગાયબ હતા. ચોરોએ રાત દરમિયાન કારના પૈડાં કાઢી લીધા હતા અને કારને એ જ સ્થિતિમાં છોડી દીધી હતી. સોશિયલ મીડિયા પર શેર કરવામાં આવેલી માહિતી પ્રમાણે, ક્રિસ્ટલ હાઉસની પ્રોપર્ટીમાં એક જ વીકેન્ડ દરમિયાન ઓછામાં ઓછી ત્રણ કારને નિશાન બનાવવામાં આવી હોવાનો દાવો કરવામાં આવ્યો છે.
ચોરોની નોટે ચોંકાવ્યા
ચોરી બાદ ઘટનાસ્થળે મળેલી કથિત નોટે સમગ્ર મામલાને વધુ વિચિત્ર બનાવી દીધો. નોટમાં પાર્કિંગ વિસ્તારમાં ચોરીની વધતી ઘટનાઓ અંગે ક્રિસ્ટલ હાઉસ મેનેજમેન્ટને ગંભીર થવા માટે સૂચન કરવામાં આવ્યું હતું. એટલે કે, ચોરી કરનારાઓએ પૈડાં તો ચોર્યા જ, પરંતુ સાથે પાર્કિંગની સુરક્ષા અંગે જાણે ફરિયાદ પણ કરી હોય તેવો સંદેશ છોડી દીધો.
સોશિયલ મીડિયા પર રમુજી પ્રતિક્રિયાઓ
આ ઘટનાની પોસ્ટ સોશિયલ મીડિયા પ્લેટફોર્મ X પર શેર થયા બાદ લોકોની અલગ-અલગ પ્રતિક્રિયાઓ સામે આવી રહી છે. કેટલાક યુઝર્સે ચોરોની નોટને લઈને રમુજી ટિપ્પણીઓ કરી. એક યુઝરે તો મજાકમાં કહ્યું કે ચોરો અંગ્રેજી બોલે છે અને તેમની પાસે પ્રિન્ટર પણ છે. અન્ય એક યુઝરે કારને જે રીતે છોડવામાં આવી તેના પર પણ રમુજી ટિપ્પણી કરી.
ઘટનાની સત્તાવાર પુષ્ટિ નથી
જોકે, આ સમગ્ર મામલે મહત્વની વાત એ છે કે ઘટનાની સ્વતંત્ર અથવા સત્તાવાર પુષ્ટિ હજુ સુધી સામે આવી નથી. ઉપલબ્ધ માહિતી પ્રમાણે સ્થાનિક પોલીસ અથવા સંબંધિત અધિકારીઓ તરફથી આ ઘટનાને લઈને સત્તાવાર નિવેદન જાહેર થયાની માહિતી નથી. સોશિયલ મીડિયા પોસ્ટમાં દર્શાવવામાં આવેલી કથિત ઘટના અને તેની ચોક્કસ લોકેશન અંગે પણ સંપૂર્ણ વિગતો સ્પષ્ટ નથી. તેથી હાલ આ મામલાને સોશિયલ મીડિયા પર સામે આવેલી માહિતી તરીકે જ જોવો યોગ્ય રહેશે.