દુબઈમાં ભારતનો દબદબો
મહિલા એશિયા કપ 2026ની ફાઇનલમાં ભારતીય મહિલા ટીમે શાનદાર પ્રદર્શન કરતાં શ્રીલંકાને 72 રને હરાવી ખિતાબ પોતાના નામે કર્યો છે. દુબઈમાં પ્રથમ બેટિંગ કરતાં ભારતે 20 ઓવરમાં 5 વિકેટે 183 રનનો મજબૂત સ્કોર બનાવ્યો હતો. જવાબમાં શ્રીલંકાની ટીમ ભારતીય બોલરો સામે 111 રનમાં ઓલઆઉટ થઈ ગઈ હતી.
શેફાલી-સ્મૃતિનો તોફાન
ભારતની જીતનો પાયો શેફાલી વર્મા અને સ્મૃતિ મંધાનાએ નાખ્યો હતો. શેફાલીએ 39 બોલમાં 68 રનની તોફાની ઇનિંગ રમી હતી, જેમાં 9 ચોગ્ગા અને 2 છગ્ગા સામેલ હતા. સ્મૃતિએ પણ 39 બોલમાં 59 રન ફટકાર્યા હતા. બંને વચ્ચે પ્રથમ વિકેટ માટે 129 રનની શાનદાર ભાગીદારી થઈ હતી. શેફાલીએ માત્ર 24 બોલમાં ફિફ્ટી પૂરી કરીને મહિલા એશિયા કપમાં સૌથી ઝડપી અર્ધસદીનો રેકોર્ડ પણ બનાવ્યો.
183 રનનો મજબૂત સ્કોર
ઓપનિંગ જોડી બાદ ભારતે અંતિમ ઓવરોમાં પણ જરૂરી રન ઉમેર્યા અને 20 ઓવરમાં 183/5નો સ્કોર નોંધાવ્યો. હરમનપ્રીત કૌર, રિચા ઘોષ અને અન્ય બેટર્સે પણ ઉપયોગી યોગદાન આપ્યું. આ સ્કોરના કારણે શ્રીલંકા સામે શરૂઆતથી જ મોટું દબાણ ઊભું થયું હતું.
ચરણી-દીપ્તિએ બોલિંગથી કમાલ કરી
184 રનના લક્ષ્યાંકનો પીછો કરવા ઉતરેલી શ્રીલંકન ટીમ ભારતીય સ્પિનરો સામે ટકી શકી નહીં. શ્રી ચરણીએ 4 ઓવરમાં 20 રન આપી 4 વિકેટ ઝડપી હતી, જ્યારે દીપ્તિ શર્માએ 4 ઓવરમાં 19 રન આપી 3 વિકેટ ઝડપી હતી. શ્રીલંકા તરફથી ચમારી અથાપથ્થુએ 36 રન બનાવ્યા, પરંતુ બાકીના બેટર્સ મોટી ઇનિંગ રમી શક્યા નહોતા. આખરે શ્રીલંકાની ટીમ 111 રનમાં સમેટાઈ ગઈ.
ભારતે ફરી જીત્યો એશિયા કપ
ભારતે શ્રીલંકા સામે 72 રનની મોટી જીત મેળવીને મહિલા એશિયા કપનો ખિતાબ પોતાના નામે કર્યો. બેટિંગમાં શેફાલી-સ્મૃતિની ધમાકેદાર શરૂઆત અને ત્યારબાદ ચરણી-દીપ્તિની ઘાતક બોલિંગ ભારતની જીતના મુખ્ય આધારસ્તંભ રહ્યા. 2024ની ફાઇનલમાં શ્રીલંકા સામે મળેલી હાર બાદ ભારતે આ વખતે શાનદાર વાપસી કરી છે.