ગોવાના રાજકારણમાં મોટો વળાંક
ગોવા વિધાનસભા ચૂંટણી 2027 પહેલા રાજ્યના રાજકારણમાં નવું સમીકરણ ઊભું થયું છે. આમ આદમી પાર્ટી અને ગોવા ફોરવર્ડ પાર્ટીએ હાથ મિલાવીને ‘ગોવા ફર્સ્ટ’ નામના ગઠબંધનની જાહેરાત કરી છે. અરવિંદ કેજરીવાલ અને GFP નેતા વિજય સરદેસાઈએ આ ગઠબંધનને ભાજપ અને કોંગ્રેસથી અલગ ત્રીજા વિકલ્પ તરીકે રજૂ કર્યું છે.
કોંગ્રેસ સાથેની વાતચીતને બ્રેક
આ ગઠબંધન એટલા માટે પણ મહત્વનું છે કારણ કે GFP અને કોંગ્રેસ વચ્ચે પણ ચૂંટણી ગઠબંધન અંગે ચર્ચા ચાલી રહી હતી. જોકે બંને પક્ષો વચ્ચેની વાતચીતમાં પ્રગતિ ન થતાં GFPએ હવે AAP સાથે આગળ વધવાનો નિર્ણય લીધો છે. તાજા અહેવાલો અનુસાર કોંગ્રેસ-GFP ચર્ચાઓ અગાઉથી જ અટવાયેલી હતી.
કેજરીવાલે પહેલેથી આપ્યા હતા સંકેત
અરવિંદ કેજરીવાલ ગોવા પહોંચ્યા તે પહેલાં જ AAP અને GFPના સંયુક્ત પોસ્ટરો સામે આવ્યા હતા. તેમાં ભાજપ અને કોંગ્રેસ બંને પર નિશાન સાધીને મતદારોને ત્રીજી વખત ‘છેતરાવા’ નહીં દેવાનો સંદેશ આપવામાં આવ્યો હતો. ત્યારબાદ કેજરીવાલે ગોવામાં મોટી જાહેરાત કરવાનો સંકેત આપ્યો અને બીજા જ દિવસે ગઠબંધનની સત્તાવાર જાહેરાત થઈ.
ત્રણ ધારાસભ્યો સાથે ત્રીજા વિકલ્પનો દાવો
હાલની વિધાનસભામાં GFP પાસે 1 ધારાસભ્ય, જ્યારે AAP પાસે 2 ધારાસભ્યો છે. GFPનું નેતૃત્વ પૂર્વ ડેપ્યુટી મુખ્યમંત્રી વિજય સરદેસાઈ કરે છે, જ્યારે AAPના ધારાસભ્યો વેંજી વીગાસ અને ક્રૂઝ સિલ્વા છે. બંને પક્ષ હવે ‘ગોવા ફર્સ્ટ’ના બેનર હેઠળ ભાજપ અને કોંગ્રેસ સામે પોતાની રાજકીય તાકાત વધારવાનો પ્રયાસ કરશે.
2027માં ત્રિકોણીય મુકાબલાની શક્યતા
2022ની ચૂંટણીમાં ભાજપે 40માંથી 20 બેઠકો જીતી હતી. કોંગ્રેસે શરૂઆતમાં 11 બેઠકો મેળવી હતી, પરંતુ બાદમાં તેના 8 ધારાસભ્યો ભાજપમાં જોડાતા કોંગ્રેસનું સંખ્યાબળ ઘટ્યું હતું. હવે AAP-GFPના નવા ગઠબંધનથી 2027ની ચૂંટણીમાં ભાજપ, કોંગ્રેસ અને ‘ગોવા ફર્સ્ટ’ વચ્ચેનું રાજકીય ગણિત વધુ રસપ્રદ બની શકે છે.