દિલજીતના શો પહેલાં ઇન્દોરમાં ધમકીભર્યા ઈમેલ
પંજાબી ગાયક દિલજીત દોસાંજના ઇન્દોરમાં યોજાનારા કોન્સર્ટ પહેલાં બોમ્બ વિસ્ફોટની ધમકી મળતાં સુરક્ષા એજન્સીઓ સતર્ક થઈ છે. 15 નવેમ્બર 2026ના રોજ શહેરના C-21 ગ્રાઉન્ડમાં તેમનો કાર્યક્રમ યોજાવાનો છે. આ કાર્યક્રમ પહેલાં ઇન્દોરની ત્રણ ખાનગી શાળાઓ અને મેયર કાર્યાલયને ધમકીભર્યા ઈમેલ મોકલવામાં આવ્યા છે. ઈમેલમાં કાર્યક્રમ દરમિયાન બોમ્બ વિસ્ફોટ કરવાની ચેતવણી આપવામાં આવી હતી.
પંજાબી ભાષામાં મોકલાયા ઈમેલ
પોલીસના જણાવ્યા અનુસાર, ધમકીભર્યા ઈમેલ પંજાબી ભાષામાં લખવામાં આવ્યા હતા. શાળાઓને મોકલાયેલા સંદેશમાં વાલીઓને પોતાના બાળકોને દિલજીતના કાર્યક્રમમાં ન મોકલવાની ચેતવણી આપવામાં આવી હતી. ઈમેલમાં 'ખાલિસ્તાની નેશનલ આર્મી' નામનો ઉલ્લેખ પણ કરવામાં આવ્યો હતો. જોકે, ઈમેલમાં કરવામાં આવેલા સંગઠન સંબંધિત દાવાની સ્વતંત્ર પુષ્ટિ થઈ નથી.
બોમ્બ સ્ક્વોડે શાળાઓમાં કરી તપાસ
ધમકીની જાણ થતાં જ પોલીસ અને બોમ્બ ડિસ્પોઝલ સ્ક્વોડની ટીમોએ ત્રણેય શાળાઓમાં તપાસ હાથ ધરી હતી. પ્રાથમિક તપાસ દરમિયાન કોઈ વિસ્ફોટક સામગ્રી મળી ન હોવાનું પોલીસ અધિકારીએ જણાવ્યું હતું. મેયર પુષ્યમિત્ર ભાર્ગવના કાર્યાલયને પણ આવો જ ધમકીભર્યો ઈમેલ મળ્યો હતો. આ મામલે ક્રાઇમ બ્રાન્ચે ઈમેલ મોકલનારની ઓળખ માટે ટેકનિકલ તપાસ શરૂ કરી છે.
પોલીસને ધમકી ફેક હોવાની પ્રાથમિક આશંકા
એડિશનલ DCP રાજેશ દંડોતિયાના જણાવ્યા મુજબ, પ્રાથમિક તપાસમાં આ ઈમેલ ફેક હોવાની આશંકા છે. જોકે, ઈમેલ પાછળ કોણ છે અને તેનો હેતુ શું છે તે જાણવા તપાસ ચાલુ છે. પોલીસે કાયદેસરની કાર્યવાહી કરવાની વાત પણ કરી છે. પોલીસ અધિકારીએ એમ પણ જણાવ્યું હતું કે કાર્યક્રમના આયોજકોએ હજુ સુધી પોલીસ પાસેથી કાર્યક્રમની મંજૂરી માટે અરજી કરી નહોતી.